«QazMunaıGaz» ortalyq apparatynyń basshylyq quramy 47,8 paıyzǵa qysqardy
ASTANA. 2 sáýir. QazAqparat - «QazMunaıGaz» ulttyq kompanııasy» aktsıonerlik qoǵamynda ortalyq apparat qurylymyn ońtaılandyrý jónindegi jumystar aıaqtaldy»,
dep habarlaıdy ulttyq kompanııanyń baspasóz qyzmeti.
«QazMunaıGaz» ulttyq kompanııasy Dırektorlar keńesiniń 2012 jylǵy 13 aqpandaǵy №1/2012 sheshimimen ulttyq kompanııanyń qyzmetkerleriniń jalpy sany men ortalyq apparat qurylymy bekitildi. Bekitilgen uıymdyq qurylym halyqaralyq deńgeıdegi munaı-gaz kompanııalarynyń úlgisinde jasalǵan. Onda beıindi mamandyǵy men munaı-gaz salasynda eńbek tájirıbesi bar mamandarǵa basymdyq berildi.
Jańartylǵan qurylym munaı jáne gaz qoryn barlaý, ıgeriletin kenishterdi basqarý, sondaı-aq munaı jáne gaz tasymaldaý, óńdeý jáne munaı hımııasyn damytý jónindegi máselelermen aınalysatyn qyzmetterdi kúsheıtýge múmkindik beredi. Kompanııada basqarý deńgeıiniń sany barynsha qysqartyldy. Munyń ózi ókilettikterdi qaıtalaýdy joıyp, basshylyq quramynyń jaýapkershiligin keńeıte túsedi. Ońtaılandyrý jónindegi jumystardy júrgizýdiń nátıjesinde «QazMunaıGaz» ortalyq apparatynyń basshylyq quramy 47,8 paıyzǵa qysqardy. Al basqarý apparatynda jumys isteıtinderdiń sany 26 paıyzǵa azaıdy.
Dál osyndaı jolmen enshiles jáne táýeldi uıymdardyń da qurylymy qaıta qaralyp, ákimshilik-basqarý quramynyń sany qysqartylýda. Jekelegen enshiles jáne táýeldi uıymdardyń «QazMunaıGaz» kompanııasynyń maqsaty men mindetterine sáıkes kelmegen jaǵdaıda, olardy belgilengen tártip boıynsha ulttyq kompanııa aktıvteriniń qurylymynan shyǵarý máselesi qarastyrylatyn bolady.
Ońtaılandyrý jumystarynyń aıasynda «QazMunaıGaz» ben onyń enshiles jáne táýeldi uıymdary ákimshilik-basqarý quramynyń jalpy sanyn qysqartý ortasha alǵanda 23 paıyzdy quraıdy.
Osylaısha «QazMunaıGaz» ulttyq kompanııasynyń ortalyq apparaty men onyń enshiles jáne táýeldi uıymdary qurylymy men sanyn ońtaılandyrý jónindegi usynylǵan sharalar ulttyq kompanııanyń tabandy damýyn qamtamasyz etýge, kúshti beıindi, aktıvti nyǵaıtýǵa jumyldyrýǵa jáne memleket úshin barynsha paıda tabýǵa múmkindik beredi.
