«QazMunaıGaz» ortalyq apparat qyzmetkerleriniń úshten birin jumystan bosatty
NUR-SULTAN. QazAqparat – «QazMunaıGaz» Ulttyq kompanııasy» AQ adamı resýrstardy basqarý jónindegi atqarýshy dırektory Dáýletjan Hasanov kompanııada daǵdarysqa qarsy strategııa jasalyp jatqanyn málim etti, dep habarlaıdy QazAqparat tilshisi.
«Ózderińiz biletindeı, buǵan deıin «QazMunaıGaz» ulttyq kompanııasynyń ortalyq apparatynda jumys isteıtin qyzmetkerlerdiń sany azaıatyny týraly habarlaǵan bolatynbyz. Koronavırýs pandemııasyna baılanysty munaı ónimderine suranystyń tómendeýi kompanııanyń qarjylyq jaǵdaıyna teris áser etip otyr. Birinshi toqsanda kompanııanyń tabysy ótken jyldyń osyndaı kezeńimen salystyrǵanda 3 ese azaıdy. Álemdik naryqta munaı baǵasynyń kúrt quldyraýy saldarynan keıbir enshiles kásiporyndarymyzda qarjy tapshylyǵy baıqalyp otyr», - dedi Dáýletjan Hasanov búgin Ortalyq kommýnıkatsııalar qyzmetinde ótken baspasóz máslıhatynda.
Osyǵan baılanysty «QazMunaıGaz» kompanııasynda daǵdarysqa qarsy strategııa jasalýda.
«Bul strategııa shyǵyndardy azaıtýǵa jáne daǵdarystan keıingi kezeńde mekemeniń tez ári tıimdi damýyna múmkindik beredi. Osy sharalardyń aıasynda Dırektorlar keńesiniń sheshimi negizinde kompanııanyń jańa qurylymy bekitildi. Oǵan sáıkes ortalyq apparattaǵy shtat 34 paıyzǵa, ıaǵnı 729-dan 480-ge deıin qysqardy. Sonymen qatar ortalyq apparattaǵy departamentterdiń sany úsh ese azaıdy. Basqarýshy dırektorlar laýazymy joıyldy. Osylaısha «QazMunaıGaz» kompanııasynyń ortalyq apparaty naryqtaǵy ózgeristerge tez ári tıimdi jaýap bere alatyndaı jınaqy bolyp, qaıta qurylady», - dedi ol.
