«QazMunaıGaz» óndiris qaýipsizdigine úles qosqan qyzmetkerlerin marapattady
«QazMunaıGaz» UK AQ-nyń enshiles kásiporyndarynyń qyzmetkerleri óndiris qaýipsizdigine, eńbek jáne qorshaǵan ortany qorǵaý isine qosqan úlesi úshin marapattaldy. Sondaı-aq saladaǵy kóshbasshy kompanııalar anyqtaldy, dep habarlaıdy QazAqparat.
«Búginde QazMunaıGaz qaýipsiz eńbek jaǵdaıyn jasaýǵa jáne bizben jumys isteıtin kez kelgen adamnyń densaýlyǵyn qorǵaýǵa, sondaı-aq kásiporyndarymyz ornalasqan óńirlerdiń ekologııalyq turaqtylyǵyn saqtaýǵa basymdyq beredi. Biz úshin bul qundylyqtar úlken mańyzǵa ıe», - dep atap ótti QMG basqarma tóraǵasy Maǵzum Myrzaǵalıev.
Úzdik qyzmetkerler kompanııalar tobynyń «Qaýipsizdik mádenıetin damytýdaǵy kóshbasshylyq» taqyrybynda ótetin jyl saıynǵy bas dırektorlar forýmynda marapattaldy. Aıtalyq, jazataıym oqıǵalar men óndiristik jaraqattyń aldyn alýǵa arnalǵan «Qorǵaý» qaýipsizdik kartasynyń úzdik baqylaýshylarynyń esimderi ataldy. Olardyń qatarynda «Atyraý munaı óńdeý zaýyty» JShS aǵa ınjener-tehnology Matveı Gerner, «QazTransOıl» AQ-nyń Aqtóbe munaı qubyry basqarmasynyń elektr-hımııalyq qorǵaý jáne áýe jelileri sheberi Ashat Esenbaev jáne «Embimunaıgaz» AQ-nyń munaı daıyndaý ýchaskesiniń sheberi Erbolat Qýanyshalıev bar.
«Qorǵaý» qaýipsizdik kartasy eńbek jáne qorshaǵan ortany qorǵaý, qaýipsizdik salasyndaǵy qaýip-qaterlerdi basqarýǵa múmkindik beredi. QMG-niń enshiles uıymdary men merdiger kompanııalarynyń qyzmetkerleri buzýshylyq faktileri anyqtalǵan kezde nemese eńbek qaýipsizdiginiń júıesin jaqsartý boıynsha usynys engizý úshin kartany toltyrady.
Jıynda óndiristegi qaýipsizdik, eńbek jáne qorshaǵan ortany qorǵaý baǵyttary boıynsha kóshbasshy kásiporyndar da anyqtaldy. «Qarajanbasmunaı» AQ órt qaýipsizdigin qamtamasyz etýdegi úzdik kórsetkishteri úshin marapattaldy. Kásiporyn jumys istep turǵan órt avtomatıkasy quraldaryn jańartý jáne órtke qarsy qyzmettiń materıaldyq-tehnıkalyq bazasyn jaqsartý baǵytynda da jumystar atqarýda.
«Pavlodar munaı-hımııa zaýyty» JShS ónerkásiptik qaýipsizdikti qamtamasyz etý jáne kásiporynnyń barlyq óndiris alańdarynda úzdiksiz jumysty qamtamasyz etý boıynsha úzdik kórsetkishteri úshin marapattaldy.
Teńizdegi qaýipsizdikti qamtamasyz etýge qosqan úlesi úshin «Qazaqteńizkólikfloty» UTKQK» JShS marapatqa ıe boldy. Kásiporynnyń kemeleri teńizdegi qaýipsizdik boıynsha barlyq halyqaralyq standarttarǵa saı paıdalanylady jáne tıisinshe jabdyqtalǵan. Bıyl shilde aıynda kompanııanyń «Suńqar» kemesiniń ekıpajy izdeý-qutqarý operatsııasyn sátti júrgizip, Kaspıı teńiziniń jaǵasynan úrlemeli matrasta 22 shaqyrym qashyqtyqqa alyp ketken úsh qyzdy qutqardy.
«Qazaq gaz óńdeý zaýyty» JShS-niń qaýipsizdik pen eńbekti qorǵaý salasyndaǵy úzdik kórsetkishteri ataldy. Kompanııa óndiristegi jumysshylardyń qaýipsizdigin qamtamasyz etýge jiti kóńil bóledi, nátıjesinde sońǵy 8 jylda kásiporynda jazataıym oqıǵa tirkelgen joq.
«Embimunaıgaz» AQ qorshaǵan ortany qorǵaýǵa qosqan úlesi úshin marapattaldy. Kompanııa kelisimshart aýmaqtarynda burynnan jınalǵan munaımen lastanǵan jerlerdi tazartý jumystaryn aıaqtady. Sondaı-aq Atyraý qalasynda shamamen 9 000 túp aǵash otyrǵyzdy.
M.Myrzaǵalıev atap ótkendeı, qaýipsizdik – QMG-niń basty korporatıvtik qundylyǵy.
«Oqıǵalarǵa «nóldik tózimdilik» tanytý – kez kelgen deńgeıdegi basshynyń saqtaýǵa tıisti mańyzdy mindeti», - dedi QMG basshysy.
«QazMunaıGaz» UK AQ 2022 jyly Halyqaralyq munaı jáne gaz óndirýshiler qaýymdastyǵynyń (IOGP) «Ómirlik mańyzy bar erejelerin» qabyldady.
