«QazMunaıGaz» óndiristegi qyzmetkerlerine eńbekaqy tóleýdiń biryńǵaı júıesin qurmaq

ASTANA. 7 tamyz. QazAqparat - «QazMunaıGaz» UK AQ óndiristegi qyzmetkerlerine eńbekaqy tóleýdiń biryńǵaı júıesin qurýdy josparlaýda. Atalmysh júıe 7 tamyzda «QazMunaıGaz» UK AQ-ynda áleýmettik áriptestikti damytý jáne eńbek daýlary men shıelenisterin retteý jónindegi keńestiń birinshi otyrysynda talqyǵa tústi, dep habarlaıdy Qordyń baspasóz qyzmetinen.

«Ústimizdegi jyly ulttyq kompanııa mamandarynan qurylǵan jumysshy toby enshiles jáne táýeldi kásiporyndarda eńbekaqy tóleý máselelerin jan-jaqty zertteý jóninde kóptegen jumys atqardy. Eńbek ujymdarynda kezdesýler uıymdastyryldy. QMG kompanııalar tobyna kiretin kásiporyndar men bólimshelerdiń ártúrli deńgeıdegi qyzmetkerleri men basshylarynyń eskertýleri esepke alyndy», - delingen aqparatta.

Jaqyn kúnderde tolyq jasalyp bitetin Biryńǵaı eńbekaqy tóleý júıesiniń avtorlary bul júıeniń artyqshylyqtaryna qazirdiń ózinde senimdi. Ol kompanııa tobyndaǵy barlyq bólimshelerdiń áleýmettik turaqtylyǵyn qamtamasyz etetin bolady. QMG mamandarynyń aıtýyna qaraǵanda, jańa júıe teńgermeshildikti joıyp, QMG kompanııalar tobyna kiretin kásiporyndar men bólimshelerde eńbekaqy ár kásiporynnyń óndiristik kórsetkishine qaraı belgilenetin bolady.

Keńeske qatysýshylar 2014-2016 jyldarǵa arnalǵan Qazaqstan Respýblıkasy munaı jáne gaz kesheni qyzmetkerleri kásipodaǵynyń Salalyq kelisim-shartyn jasaý jóninde óz usynystaryn bildirdi. QMG kásipodaq aktıvi júz myńnan astam munaıshylar men gaz óndirýshilerdiń, kóptegen servıstik jáne munaı óńdeýshi kásiporyndar ókilderiniń basyn quraıtyn respýblıkalyq qoǵamdyq birlestik mártebesindegi munaı jáne gaz ónerkásibi qyzmetkerleriniń biryńǵaı salalyq kásipodaǵyn qurý ıdeıasyn usyndy.

QR Kásipodaqtary federatsııasy tóraǵasynyń orynbasary Qaırat Amandyqov bul ıdeıany qoldaıtyndyqtaryn aıta kelip, mundaı uıymnyń qurylýy «QazMunaıGaz» UK AQ-ynda áleýmettik beriktikti nyǵaıtýdyń qosymsha faktory bolatyndyǵyna nazar aýdardy.

Kásipodaq birlestikteriniń jetekshileri men QMG kompanııalar tobynyń eńbek ujymdarynyń ókilderi shaqyrylǵan keńes jumysyna QR Kásipodaqtary federatsııasy tóraǵasynyń orynbasary Qaırat Amandyqov, «KAZENERGY» munaı-gaz jáne energetıkalyq keshender uıymdarynyń qazaqstandyq assotsatsııasynyń atqarýshy dırektory Toǵjan Qojalıeva, QMG apparat basshysy Andar Shoqpytov qatysty.