QazMunaıGaz ókilderi jańaózendik jumysshylarmen kezdesti
«QazMunaıGaz» mamandarymen birge kelissózge «BerÁli Mańǵystaý Company» JShS jáne «Ai-Bis» JShS (tenderde jeńiske jetken kompanııa) basshylyǵy da qatysty. Jumysshylarǵa jalaqylaryn saqtaı otyryp, «Ai-Bis» JShS jáne «Kezbı» JShS (munaı servıs qyzmetterin kórsetedi) kompanııalaryna jumysqa ornalasý usynyldy.
«Jumysshylar basqa kompanııaǵa aýysqan kezde olardyń burynǵy eńbek jaǵdaıy, sonyń ishinde jalaqy mólsheri men áleýmettik paketi saqtalýy kerek. Tender qortyndysy boıynsha «ÓzenMunaıGaz» AQ merdigeri atanǵan kompanııaǵa osyndaı mindet qoıyp otyrmyz. Alaıda, quqyqtyq rásimderge saı áreket etý kerek, jumysshylar muny túsinýi qajet», - dep atap ótti «QMG» apparatynyń basshysy Erhan Omarov kelissóz barysynda.
«BerÁli Mańǵystaý Company» kompanııasynyń burynǵy qyzmetkerleri «ÓzenMunaıGazǵa» jumysqa turǵyzýdy talap etip, usynylǵan jumys oryndarynan bas tartty.
Olarǵa qabyldanǵan quqyqtyq rásimderdi aınalyp ótip, «ÓzenMunaıGaz» AQ shtatyna jumysqa ornalasý jónindegi talap zańsyz ekeni túsindirildi. Bul Jańaózendegi jumyssyzdardy kezek boıynsha atalǵan mekemege jumysqa ornalastyrý tártibine qaıshy keledi. Atalǵan ereje monoqala turǵyndarynyń talabyna saı, jumys oryndaryn ádil bólý úshin qabyldanǵan bolatyn.
Kelissózder áli de jalǵasady.
Eske salsaq, keshe Energetıka mınıstrligi ǵımaratynyń aldyna 70-ke jýyq jańaózendik («Beraly Mańǵystaý Company» kompanııasynyń burynǵy qyzmetkerleri) jınaldy.Búgin Energetıka mınıstri Almasadam Sátqalıev Úkimet otyrysynan keıin BAQ ókilderine bergen suhbatynda vedomstvo ǵımaratynyń mańaıynda túnep shyqqan jańaózendik jumysshylardyń talaptary boıynsha resmı sheshim ázirlenip jatqanyn aıtty.Bul máselege baılanysty pikir bildirgen vıtse-premer Altaı Kólginov zań aıasynda áreket etý qajettigin, «tenderden utylǵan kompanııanyń qaıtadan utyp shyqqanyn talap etý» durys emestigin aıtty.