«QazMunaıGaz» nege reseılik kompanııalarǵa áýes – Áset Maǵaýovtyń jaýaby
ASTANA. KAZINFORM – «QazMunaıGaz» aktsıonerlik qoǵamy basqarma tóraǵasynyń orynbasary Áset Maǵaýov ulttyq kompanııanyń nege reseılik kompanııalarmen áriptestikke áýestenip ketkenin túsindirdi.
— Jyl basynda «QazMunaıGaz» sanktsııaǵa baılanysty qıyndyqqa tap bolǵan «Lýkoıldyń» Bolgarııadaǵy munaı óńdeý zaýytyn satyp alýy múmkin degen aqparat shyqty. Odan keıin Atyraý munaı óńdeý zaýytyn «Tatneftke» satady degen áńgimeniń ortasynda qaldyńyzdar. Onymen qoımaı «Samuryq-Qazynanyń» quramyndaǵy shyǵynǵa batqan polımer zaýytyn satyp alyp, 60 paıyz úlesin «Sıbýr» holdıngine sattyńyzdar, — dedi jýrnalıst.
Áset Maǵaýov jýrnalıstiń bul ýájimen kelispeıtinin aıtty.
— «QazMunaıGaz» óz jumysynda tek reseılik kompanııalar emes, basqa da kóptegen kompanııamen jumys istep jatyr. Eýropa bolsyn, Amerıka bolsyn, mysaly, Qytaı kompanııalarymen jobalardy qarqyndy túrde iske asyryp jatyr, — dep jaýap berdi ol.
Sondaı-aq, ol Atyraý munaı óńdeý zaýytynyń úlesin senimgerlik basqarýǵa alýǵa Qytaı kompanııasy da qyzyǵýshylyq tanytqanyn málim etti.
— «Lýkoıl» men Bolgarııany aıtsaq, zaýyt baǵasy arzan bolsa, konkýrsqa qatysyp kóreıik dep sheshkenbiz. Biraq bizdiń usynystar ótpeı qaldy. Atyraý munaı óńdeý zaýytyna «Tatneftten» basqa da kompanııalarmen talqylanyp jatqanyn aıttyq. Tek «Tatneft» emes, Sinopec Group sııaqty kompanııalar da suranys berip jatyr. Rasymen Polimer Production zaýytynyń 60 paıyz úlesin «Sıbýrǵa» sattyq. Óıtkeni bul holdıngtiń munaı-hımııa salasynda tájirıbesi mol. Polımer jabyn shyǵaratyn zaýyt eki jyldaı turyp qaldy. Damytý úshin kóptegen ınvestıtsııa kerek. «Sıbýrdyń» ınvestıtsııa tartý jaǵynan, marketıng jaǵynan tájirıbesi bar. Jobaǵa aqsha salyp, kúsh jumsaýǵa óz usynystaryn berdi. Basqa kompanııalar tarapynan ondaı usynys bolǵan joq. Bir jyldyń ishinde osy zaýytty qaıta iske qosamyz degen jospar bar, — dedi Áset Maǵaýov.
Sondaı-aq, Úkimet otyrysynda «QazMunaıGaz» kompanııasy polıetılen óndirisine 11 mlrd teńge ınvestıtsııa tartatynyn aıtyldy.