«Qazmunaıgaz» Mańǵystaýdaǵy munaıdan lastanǵan jerlerdi tazartady – Ekologııa mınıstri
Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev málimdedi.
Bizde aýyr ónerkásip, aýylsharýashylyq kesheniniń jáne taý-ken óndirisiniń qaldyǵy kóp. Elimiz boıynsha shamamen 31 mıllıard tonna ónerkásiptik qaldyq bar jáne jyl saıyn shamamen 1 mıllıard tonna qaldyq jınalady. Bul negizinen tehnogendik-mıneraldy túzilimder, sonyń ishinde arshyma taý jynystary, kúl-qoqys, óńdeý ónerkásip qaldyqtary jáne basqalary bar. Árıne, olardy óńdeý boıynsha birqatar jumys júrgizilýde. 2018 jyly óńdeý deńgeıi shamamen 32% qurady, bul 2015 jylǵy kórsetkishten 9% joǵary. Qalǵany jyl saıyn qaldyq qoımalary men polıgondarǵa shyǵarylady, bul – shamamen 680 mıllıon tonna», - dedi mınıstr QR Parlamenti Senatynda «Turmystyq jáne ónerkásiptik qaldyqtardy jınaý jáne óńdeý» taqyrybyndaǵy Úkimet saǵatynda.
Mınıstr ónerkásiptik qaldyqtardyń negizgi úlesi taý-ken óndirýshi kásiporyndarǵa tıesili ekenin atap ótti. Qazir tehnogendi-mıneraldy túzilimderdiń memlekettik kadastrinde 1500 nysan tirkelgen. Olardyń qorshaǵan ortaǵa teris áserin azaıtý úshin naqty sharalar qabyldanýy kerek, buǵan birqatar kásiporyn jumyldyrylǵan.
«Máselen, 2018 jyly «Qazaqstan alıýmınııi» AQ óńdelgen karerge 13,3 mln tonna taý jynystaryn tókti, al «QazAvtoJol» UK» AQ kúl-qoqys qaldyqtaryn jol qurylysynda tabıǵı tas materıaldardyń ornyna paıdalanady. Qaýipti óndiristik qaldyqtarǵa munaı qaldyqtary da jatady.
Munaı óndirisinen jylyna 800 myń tonnaǵa jýyq qaldyq shyǵady, onyń 500 myń tonnasy óńdeledi. Sonymen birge, munaı qaldyqtaryn qaıta óńdeý jáne joıý jumystarymen aınalysatyn birqatar jaýapsyz kásiporyndar bar. Mınıstrliktiń Ekologııalyq retteý jáne baqylaý komıteti olardyń qaýipti hımııalyq qaldyqtardy joıý qyzmetinen óreskel ekologııalyq buzýshylyqtardy anyqtady. Mınıstrlik «QazMunaıGaz» UK memorandým bekitti, onyń aıasynda Mańǵystaý oblysynyń munaıdan lastanǵan jalpy kólemi 2,5 mln tekshe metr aýmaǵyn tazartý sharalary bastaldy. Ekologııalyq talaptardy kúsheıtip, ekologııalyq zańnamany reformalaý aıasynda qaýipti qaldyqtardy shyǵarý men joıýdy lıtsenzııalaý engiziledi», - dedi Maǵzum Myrzaǵalıev.
