«QazMunaıGaz» Mańǵystaý oblysyndaǵy enshiles uıymdarynyń kásipodaq kóshbasshylaryn Túrkistanda jınady

TÚRKІSTAN. QazAqparat - Túrkistanda «QazMunaıGazdyń» Mańǵystaýdaǵy enshiles uıymdarynyń kásipodaq kóshbasshylaryna arnalǵan trenıng ótti, dep habarlaıdy QazAqparat.

Oqý baǵdarlamasy «QazMunaıGaz» UK AQ kompanııalar tobynda korporatıvtik mádenıetti arttyrý saıasaty aıasynda uıymdastyryldy. Eki kúndik is-sharaǵa «Mańǵystaýmunaıgaz», «Qarajanbasmunaı», «Ózenmunaıgaz», «ÓzenMunaıServıs», «OılTransportKorporeıshn», CASPIBITUM, Qazaq gaz óńdeý zaýyty sekildi ózge de kásiporyn basshylary men kásipodaq kóshbasshylary qatysty.

Oqý barysynda qatysýshylar qarjylyq saýat boıynsha paıdaly aqparat alyp, jańa daǵdylar úırendi, óz kompanııalarynda týyndaǵan ózekti máselelerdi taldap, iskerlik oıyn formatynda daǵdarys kezindegi is-áreketterin pysyqtady.

Trenıngterge «QazMunaıGaz» UK AQ Basqarma Tóraǵasy Maǵzum Myrzaǵalıev te qatysty. Ol is-sharaǵa kelgen qatysýshylarǵa mundaı kezdesýler dástúrge aınalatynyn jáne ár jıyn saıyn qatysatyn qyzmetkerler sany artyp otyratynyn jetkizdi.

«Bul is-sharalardy kásibı deńgeıimizdi kóterý úshin ǵana emes, ujymnyń uıymshyldyǵy men yntymaǵyn odan ári arttyrý úshin uıymdastyratynymyzdy erekshe atap ótkim keledi. Bizdiń maqsatymyz – bir, mindetterimiz – ortaq. Jumysta týyndaǵan ózekti máselelerdiń tıimdi sheshimin birlese otyryp qana taba alamyz», - dedi óz sózinde Maǵzum Myrzaǵalıev.