«QazMunaıGaz» «Lýkoıldyń» Qarashyǵanaqtaǵy úlesin satyp alatyny týraly málimetti teristedi

ASTANA. KAZINFORM — «QazMunaıGaz» ulttyq kompanııasynyń baspasóz qyzmeti AQSh sanktsııasyna tap bolǵan reseılik «Lýkoıl» kompanııasynyń Qarashyǵanaqtaǵy úlesin 300 mln dollarǵa satyp alatyny týraly málimetti teriske shyǵardy.

— Keıbir buqaralyq aqparat quraldary «QazMunaıGaz» kompanııasy Qarashyǵanaq jobasyndaǵy LÝKOIL-dyń úlesin satyp alýy múmkin degen habar taratýda. Bul aqparat shyndyqqa janaspaıdy. Jalpy, QMG seriktesterimen birlesip, Qarashyǵanaq jobasyna sanktsııalyq shekteýlerdiń yqpalyna qatysty turaqty ári keshendi taldaý júrgizip keledi, — dep jazylǵan kompanııanyń sońǵy málimetinde.

Aıta ketý kerek, atalǵan málimetti Nege.kz saıty óz derekkózine súıenip osyndaı málimet taratqan. 

Materıalda Qazaqstan AQSh sanktsııasyna tap bolǵan reseılik «Lýkoıl» kompanııasynyń Qarashyǵanaqtaǵy úlesin 300 mln dollarǵa satyp alý týraly usynys ázirlep, jibergeni aıtylǵan. Sondaı-aq, «Lýkoıldyń» Qarashyǵanaq jobasynda 13,5% úlesi bar ekeni, byltyr osy úlesten 180 mln dollar tabys kórgeni de keltirilgen. 

Eske salsaq, Energetıka mınıstriniń orynbasary Sanjar Járkeshov Úkimet otyrysynan keıin ótken baspasóz máslıhatynda sanktsııaǵa túsken «Lýkoıldyń» Qazaqstandaǵy jobalary týraly pikir bildirgen edi.