«QazMunaıGaz» kýbogy úshin ótken shaǵyn fýtboldan qalalyq balalar-jasóspirimder sport týrnıriniń jeńimpazdary marapattaldy
ASTANA. 23 mamyr. QazAqparat - Keshe elordadaǵy № 28 orta mekteptiń sport alańynda QR Táýelsizdiginiń 20-jyldyǵyna oraı «QazMunaıGaz» kýbogy úshin ótkizilgen shaǵyn fýtboldan qalalyq balalar-jasóspirimder týrnıri jeńimpazdaryn marapattaý saltanatty ótti,
dep habarlady atalǵan kompanııanyń baspasóz qyzmetinen.
Sharany «QazMunaıGaz» UK AQ, Qazaqstan fýtbol Federatsııasy, Astana qalasy Bilim basqarmasy jáne «Shyǵys» balalar jasóspirimder ortalyǵy uıymdastyrdy. Oǵan 2000-2001 jyldary dúnıege kelgen Astana qalasy jalpy bilim berý mektepteriniń 80 oqýshysy qatysty. Ótkizilgen oıyndardyń nátıjesi boıynsha birinshi oryndy №59 orta mekteptiń komandasy, ekinshi oryndy №54 orta mekteptiń komandasy, úshinshi oryndy №48 orta mekteptiń komandasy ıelendi.
Jeńimpazdardy «QazMunaıGaz» UK AQ Basqarmasynyń tóraǵasy Qaıyrgeldi Qabyldın, Qazaqstan Fýtbol Federatsııasynyń vıtse-prezıdenti Seıilda Baıshaqov quttyqtady. «Bul týrnır sport pen salaýatty ómir saltyn nasıhattaý jónindegi «QazMunaıGaz» ulttyq kompanııasy áleýmettik saıasatynyń bir bóligi bolyp tabylady. Osy kezdesýlerdiń QMG sport alańdarynda ótkizilýi kóńilge qýanysh uıalatady. Bul alańdar Elbasymyz Nursultan Nazarbaevtyń elimizde buqaralyq sportty damytý jónindegi bastamasyn júzege asyrý maqsatynda salyndy, - dep atap kórsetti Q.Qabyldın.
Bıylǵy jyly osyndaı sport sharalary QMG enshiles kompanııalarynyń qoldaýymen Shymkent jáne Pavlodar qalalary mektep oqýshylarynyń arasynda da ótkiziledi. Shaǵyn fýtboldan týrnırler «QazMunaıGaz» UK kóp fýnktsıonaldy sport alańdarynda ótkiziledi. Qurylys baǵdarlamasyna sáıkes 2010 jyly QMG jáne onyń enshiles kompanııalary 29 sport alańynyń qurylysyn aıaqtady. Aǵymdaǵy jyly 20 sport alańyn salý josparlanyp otyr.
Sport alańynyń qurylysyna qoldanylatyn materıaldar men tehnologııalar ekologııalyq, sanıtarlyq-gıgıenalyq, órtke qarsy jáne basqa da erejeler men talaptarǵa saı keledi jáne sporttyq jamylǵyny kásibı túrde ornatý kózdelip otyr. Fýtbol alańyndaǵy jasandy kógal FIFA jáne UEFA-da sertıfıkattalyp, attestatsııalaýdan ótken.
Qalalyq týrnırde jeńimpaz atanǵan komanda jáne 2-shi, 3-shi oryn alǵan komandalar «QazMunaıGaz» kýbogymen, dıplomdarmen, sáıkes dárejedegi medaldar jáne estelik syılyqtarmen marapattaldy.
