«QazMunaıGaz» kompanııasynyń 10 jyldyǵyna arnalǵan logotıptiń irikteý kezeńine 6 jumys tańdap alyndy
ASTANA. 17 aqpan. QazAqparat - «QazMunaıGaz» kompanııasynyń 10 jyldyǵyna arnalǵan úzdik logotıptiń irikteý kezeńiniń qorytyndysy shyǵaryldy.
Baıqaýdyń maqsaty - «QazMunaıGaz» UK AQ mereıtoıyna arnalǵan logotıp jasaý.
«QazMunaıGaz» UK» AQ 2002 jyldyń 20 aqpanynda QR Prezıdentiniń Jarlyǵymen «Qazaqoıl» Ulttyq munaı-gaz kompanııasy jáne «Munaı-gaz tasymaldaý» Ulttyq kompanııasyn biriktirý arqyly qurylǵandyǵy belgili.
Іrikteý jáne aqtyq kezeńderge bólingen baıqaýǵa 2011 jyldyń 23 jeltoqsany men 2012 jyldyń 15 aqpany aralyǵynda maman dızaınerler men sýretshilerden, sondaı-aq áýesqoılardan, stýdentter men mektep oqýshylarynan, barlyǵy 17 qatysýshydan 65 jumys kelip tústi.
Іrikteý týrynyń nátıjeleri boıynsha, qazylar QMG, enshiles jáne táýeldi uıymdardyń jalpy on-line túrinde daýys berýi arqyly aqtyq kezeńge qatysý úshin 6 logotıpti tańdap aldy.
Atap aıtqanda, Valerıı Jbanovtyń, Samat Qazkenovtyń, Vıktorııa Sattarova, Margarıta Neprokına, Abaı Omarov pen Evgenıı Petrovtyń jumystary aqtyq synǵa ótti.
