«QazMunaıGaz» kompanııasy shet elderde aktıvter satyp alý esebinen óz bıznesiniń geografııasyn keńeıtedi - Q.Qabyldın
ASTANA. Qazannyń 5-i. QazAqparat /Marlan Jıembaı/ - «QazMunaıGaz» kompanııasy shet elderde aktıvter satyp alý esebinen óz bıznesi geografııasyn keńeıtý máselesin odan ary da qarastyratyn bolady.
Bul týraly búgin elordada ótip jatqan «KAZENERGY» 5-shi eýrazııalyq forýmy aıasynda uıymdastyrylǵan baspasóz máslıhaty barysynda atalǵan kompanııanyń basshysy Qaıyrgeldi Qabyldın aıtty.
«Rompetrol aktıvterin satyp alý vertıkaldy kompanııa qurý ıdeıasyna sáıkes keledi jáne qazirgi ýaqytta bul aktıvter Eýropalyq odaqtaǵy qazaqstandyq munaı úshin forpost bolyp tabylady. Ol qazirgi tańda jańartylý ústinde. Biz jańartý úshin 1,5 mıllıard dollar jiberetin bolamyz jáne kelesi jyldyń ortasynda Eýro-6 standarty boıynsha ónim shyǵaratyn Eýropadaǵy eń zamanaýı aktıv alamyz», - dedi kompanııa basshysy óz sózinde.
Esterińizge sala keteıik, ótken jyldyń ortasynda «QazMunaıGaz» The Rompetrol Group NV (TRG) kompanııasynyń 25 paıyz aktsııasyn satyp alýdy aıaqtaǵan bolatyn. Sonyń arqasynda QMG 100 paıyz TRG aktsııasyna ıelik etip otyr. Atalǵan kompanııa Rýmynııadaǵy iri munaı-gaz holdıngi. Onyń quramyna úsh zaýyt jáne Rýmynııa, Frantsııa, Ispanııa, Moldova, Ýkraına, Bolgarııa, Grýzııa memleketterinde ornatylǵan 1042 janarmaı quıý stansysy kiredi.
