«QazMunaıGaz» kompanııalar toby 2010 jyldyń basynan beri qorshaǵan ortany qorǵaý is-sharalaryna 1,3 mlrd. teńgeden astam qarjy bóldi
ASTANA. Maýsymnyń 8-i. QazAqparat /Qanat Mámetqazyuly/ - Búgin Astanada «QazMunaıGaz» UK AQ enshiles jáne táýeldi uıymdary basshylarynyń, mamandarynyń qatysýymen eńbek, qorshaǵan ortany qorǵaý máseleleri jónindegi jyl saıynǵy XI keńes bolyp ótti. Onyń jumysyna «QazMunaıGaz» UK AQ basqarma Tóraǵasynyń orynbasary - basqarýshy dırektor Bolat Palymbetov qatysty,
dep habarlaıdy QazAqparat.
«QazMunaıGaz» UK Eńbek, qorshaǵan ortany qorǵaý departamentiniń dırektory Nurlan Sırajevtyń aıtýynsha, jyl saıyn «QMG» kompanııalar toby eńbek qaýipsizdigin qamtamasyz etý jáne óndiristik jaraqattanýshylyqty tómendetý jónindegi is-sharalarǵa qomaqty qarjy aýdaryp keledi. Osylaısha, jumys ýaqytyn joǵaltý jaǵdaılarynyń jıilik koeffıtsıenti 2008 jylǵy 0,032-den 2009 jyly 0,020 deıin tómendegen.
Sonymen qatar, aǵymdaǵy jyly kompanııa qyzmetiniń qorshaǵan ortaǵa tıgizetin yqpaldyq kórsetkishteri jaqsarǵan. Sońǵy jyldary jańa aktıvterdi satyp alý esebinen óndiris kóleminiń ulǵaıýyna qaramastan, munaı óndirý jáne óńdeý, munaı men gazdy tasymaldaýdaǵy tastalymdardyń menshikti úlesiniń kólemi tómendegen.
«Uzaq merzimdi damý strategııasynyń negizgi basymdyqtarynyń biri sanalatyn óndiristik ekologııalyq monıtorıngtiń tıimdi júıesin qurý jónindegi jumystar jalǵasyn tapty. Aerokosmostyq ekologııalyq monıtorıng júıesi jumys jasaıdy jáne QMG-nyń ekologııalyq málimetter bazasy únemi jańartylyp otyrady. Jalpy jyl basynan beri jalpy «QazMunaıGaz» kompanııalar toby boıynsha qorshaǵan ortany qorǵaý is-sharalaryna 1,3 mlrd. teńgeden astam qarjy bólindi», delingen baspasóz baıanynda.
