QazMunaıGaz qıyn óndiriletin qorlardan munaıdy ınnovatsııalyq tehnologııamen alyp jatyr
ASTANA. KAZINFORM – «QazMunaıGaz» qıyn óndiriletin qorlardan munaıdy ınnovatsııalyq tehnologııalarmen alyp jatyr. Bul týraly Úkimet otyrysynda atalǵan kompanııanyń basqarma tóraǵasy Ashat Hasenov aıtty.
- Búgingi tańda operatsııalyq aktıvterde munaıdyń alynatyn qaldyq qory shamamen 445 mln tonnany quraıdy jáne onyń 50 paıyzdan astamy qıyn óndiriletin qorlarǵa jatady. Osyǵan baılanysty «QazMunaıGaz» qıyn óndiriletin qorlardy ıgerýge tartý úshin ınnovatsııalyq tehnologııalardy engizýde. Negizgi baǵyttardyń biri – polımerlik sý aıdaý tehnologııasyn aýqymdy túrde qoldaný. Tutqyrlyǵy joǵary munaı kenishterin ıgerý úshin bý men sýdy kezektep aıdaý tehnologııasy engizilýde, - dedi ol.
Sonymen qatar onyiń aıtýynsha, zamanaýı burǵylaý tehnologııalary da qoldanylyp jatyr.
Saǵasy 45 gradýs kólbeý uńǵymalar burǵylana bastaldy. Bul qosymsha 2,2 mln tonna óndiriletin qorlardy ıgerýge múmkindik berdi. Dıametri shaǵyn uńǵymalar Slim Hole tehnologııasy qoldanylyp burǵylandy. Ol shyǵyndardy 30 paıyzǵa qysqartýǵa yqpal etti.
- «QazMunaıGaz» ınnovatsııalyq tehnologııalardy damytýǵa baǵyttalǵan arnaıy Tehnologııalyq syn-qaterler baǵdarlamasyn iske asyrýda. 2025 jyly osy baǵdarlama aıasynda qosymsha 434 myń tonna munaı óndirildi. Munaı óndirýdi 2040 jylǵa qaraı qosymsha 54 mln tonnaǵa arttyrý jospary eski ken oryndarynyń ómirin arttyrady. Osylaısha ken orny tóńiregindegi eldi mekenderdiń áleýmettik turaqtylyǵy qamtamasyz etilip, halyq jumyspen qamtylady. Budan bólek, qorlardyń shamamen 90 paıyzyn quraıtyn 12 negizgi ken ornynda tsıfrlyq syńarlar engizile bastaldy. Tsıfrlyq syńarlar geologııalyq-tehnıkalyq is-sharalardyń tıimdiligin arttyrýǵa, óndiris kólemin jyl saıyn 3%-ǵa deıin ósirip otyrýǵa múmkindik beredi, - dedi Ashat Hasenov.
Buǵan deıin Úkimet otyrysynda ınnovatsıchlardy damytý máselesi talqylanatynyn jazǵan edik.
