«Qazmunaıgaz» qazirgi 80 myń jumys orynyn 50 jyl boıy ustap tura alady – Ashat Hasenov

ASTANA. KAZINFORM – «Qazmunaıgaz» kompanııasynyń basqarma tóraǵasy Ashat Hasenov BAQ ókilderimen ótken baspasóz máslıhatynda qazirgi jumys oryndaryn neshe jyl boıy ustap tura alatyndaryn aıtty.

«Qazirgi tańda «Qazmunaıgaz» ulttyq kompanııasyna tıesili munaıdyń qory 780 mln tonna. Jyldyq munaı óndirý deńgeıimiz orta eseppen – 24 mln tonna. Osy 800 mln tonna munaıdy 20 mln tonnaǵa bóledi de, 40 jyldyq qory bar dep eseptep jatady. Bul matematıkalyq turǵydan durys. Biraq jyl saıyn munaı qoryn ósirýge jumys istep jatyrmyz. Geologııalyq barlaý jumystary júredi. ıAǵnı, 780 mln tonna degen qatyp qalǵan, eshqashan óspeıtin kórsetkish emes. Jańaǵy aıtyp otyrǵan 50 myń óz adamdarymyz ben 30 myń merdigerlerdiń jumysshylaryn jumyspen qamtamasyz etý – bizdiń mindetimiz», - dedi kompanııa basshysy.

Ashat Hasenov kompanııa óńdeý salasyn damytý arqyly da jumys oryndaryn qysqartpaı ustap turýǵa múmkindik bar ekenin aıtady. 

«Tek munaı óndirý arqyly ǵana jumys oryndaryn ustaımyz degen ustanym bolmaý kerek. Bizde munaı óńdeý bar. Munaı-gaz-hımııa deıtin jańa baǵyt qarqyn alyp keledi. Mysaly polıetılen, karbamıd, polıetılentereftalat jobalary iske qosylǵanda 2 myńnan astam adam, qurylys kezinde 15 myń jumysshy qajet bolady. Biz óz ujymymyzdyń ishinde qajet bolǵan jaǵdaıda jańa jobalarǵa oqytyp, qaıta daıarlaı alamyz. Qazirgi tańda jumys orny qysqarady degen eshqandaı qaýip joq. 780 mln tonnany 40 jyl dep bólip otyrmyz ǵoı. Biraq 80 myń jumysshynyń bári munaı óndirisinde ǵana júrgen joq. Munaımen baılanysty ónerkásiptiń birneshe salasynda júr. Sondyqtan kem degende 50 jyl boıy qazirgi jumys oryndaryn ustap tura alamyz degen jospar bar. Óıtkeni jańa ken oryndary ashylady, munaı-gaz-hımııanyń jańa baǵyttary paıda bolyp jatyr», - dedi ol.