QazMunaıGaz qazaqstandyqtarǵa aı saıyn 117 myń teńgeden tólep turady degen málimet jalǵan

ASTANA. QazAqparat - Alaıaqtar qaznette taǵy da belsendi naýqan júrgizip jatyr. Bul joly áleýmettik jeli paıdalanýshylaryna «QazMunaıGaz» kompanııasynyń qazaqstandyqtarǵa aı saıyn 117 myń teńgeden tóleýge mindettelgeni jaıly habar tarady. Bul jalǵan, dep habarlaıdy QazAqparat Stopfake resýrsyna silteme jasap.

Jarnamaǵa sáıkes, tólem alý úshin áýeli kompanııaǵa 110 myń teńge salý qajet. Munyń bári - alaıaqtardyń isi.

Bul týraly eskertý «QazMunaıGaz» AQ resmı saıtynda jarııalanǵan.

– Qazirgi ýaqytta alaıaqtar arnaıy saıt, qosymsha jáne áleýmettik jelilerde paraqshalar ashyp, solar arqyly jarnama taratyp, qazaqstandyqtarǵa «QazMunaıGaz» ulttyq kompanııasyna ınvestıtsııa quıýdy usynady. Nátıjesinde, alaıaqtar munaı men gaz satýdan tez paıda tabýǵa bolady deıdi. «QazMunaıGaz» UK AQ Qazaqstan azamattarynyń qarajatyn ınvestıtsııalyq jobalarǵa tartpaıtynyn málimdeıdi. Taralǵan jarnama jalǵan jáne alaıaqtyq sıpatqa ıe. Qazaqstandyqtardan qyraǵy bolýdy jáne tek resmı derekkózderge ǵana senýdi suraımyz, – delingen portalda.

Sondaı-aq mátinde kompanııanyń qyzmeti týraly barlyq aqparatty YouTube, Facebook, Instagram, Telegram áleýmettik jelilerindegi resmı paraqshalardan alýǵa bolatyny aıtylǵan.

Alaıaqtar buǵan deıin de qazaqstandyqtarǵa iri kompanııalar atynan tólem jasalady dep habarlaǵan bolatyn. Mundaı jarnamalyq habarlamalar iri bankter men krıptobırjalardyń atynan taraǵan.