«QazMunaıGaz» Karaton Operating Ltd kompanııasynyń 50% úlesin «Tatneftke» satady
ASTANA. KAZINFORM – «QazMunaıGaz» ben «Tatneft» bıyl «Qaraton Podsolevoı» ýchaskesinde geologııalyq barlaýdy bastaıdy. Bul týraly QMG baspasóz qyzmeti málimdedi.
«QazMunaıGaz» UK AQ jáne «Tatneft» JAQ Atyraý oblysyndaǵy «Qaraton Podsolevoı» jer qoınaýy ýchaskesinde geologııalyq barlaý jumystaryn júrgizý úshin birlesken kásiporynnyń negizin qalamaq.
Bul týraly kelisim 2024 jyly 21 aqpanda Qazan qalasynda jasaldy. «QazMunaıGaz» UK AQ jáne «Tatneft» JAQ Satyp alý-satý shartyna, Aktsıonerler kelisimine jáne «Qaraton Podsolevoı» jobasy boıynsha qarjylandyrý týraly kelisimge qol qoıdy.
«QazMunaıGaz» Satyp alý-satý sharty boıynsha Karaton Operating Ltd («Qaraton Podsolevoı» jobasynyń operatory) kompanııasynyń 50% úlesin «Tatneft» JAQ-qa satady. Qujattarǵa «QazMunaıGaz» UK AQ Basqarma tóraǵasy Maǵzum Myrzaǵalıev pen «Tatneft» JAQ bas dırektory Naıl Maganov qol qoıdy.
«Memleket basshysy shıkizat sektory men geologııalyq barlaýǵa sheteldik ınvestıtsııa tartý týraly mindet qoıdy. Osyǵan baılanysty biz birqatar ınvestormen kelissóz júrgizdik jáne «Qaraton Podsolevoı» jobasy boıynsha seriktesimiz geologııalyq barlaý jáne munaı-gaz ken oryndaryn ıgerý salasynda tájirıbesi mol «Tatneft» kompanııasy atanǵanyna qýanyshtymyz. Tereńdigi 5500 metr bolatyn alǵashqy barlaý uńǵymasyn burǵylaý 2024 jylǵa josparlanyp otyr», - dep atap ótti M. Myrzaǵalıev.
«Qazaqstandyq áriptesterimizben túrli baǵyt boıynsha ózara tıimdi baılanysta jumys istep kelemiz jáne bul jemisti yntymaqtastyǵymyzdyń aýqymy keńeıip kele jatqanyna qýanyshtymyz. «QazMunaıGazǵa» áriptestik boıynsha usynys, onyń ishinde geologııalyq barlaý salasyndaǵy seriktestikke shaqyrǵany úshin alǵys aıtamyz», - dep atap ótti N.Maganov.
«Qaraton Podsolevoı» ýchaskesi Atyraý jáne Mańǵystaý oblystarynda «Embimunaıgaz» AQ ken oryndarynyń janynda ornalasqan.
2023 jyly maýsymda «QazMunaıGaz» «Qaraton Podsolevoı» jer qoınaýy ýchaskesinde kómirsýtekterdi barlaýǵa jáne óndirýge kelisimshart aldy. Al 2023 jyly qyrkúıekte jobany iske asyrý úshin «Astana» halyqaralyq qarjy ortalyǵynyń aýmaǵynda Karaton Operating Ltd jeke kompanııasy tirkeldi. Sol jyly qarashada QMG jer qoınaýyn paıdalaný quqyǵyn Karaton Operating Ltd paıdasyna berdi.
