«QazMunaıGaz» Qarashyǵanaq gaz óńdeý zaýytynyń qunyn aıqyndaıtyn qujatqa qol qoıdy
ASTANA. KAZINFORM — «QazMunaıGaz» ulttyq kompanııasy men Qytaıdyń «CITIC Construction Co., Ltd» kompanııasy arasynda Qarashyǵanaq gaz óńdeý zaýytyn salý boıynsha yntymaqtastyqtyń bazalyq qaǵıdattary týraly kelisimge qol qoıyldy.
— Qujat Qarashyǵanaq gaz óńdeý zaýytynyń jobasyn iske asyrý negizderin, onyń ishinde qunyn baǵalaý, jabdyqtar jıyntyǵyn jáne yntymaqtastyq baǵyttaryn aıqyndaıdy. Sonymen qatar taraptar jobalyq qujattamany (FEED) ázirleýge kóshý, tıimdi tehnıkalyq jáne uıymdastyrýshylyq sheshimderdi izdeý úshin ary qaraı birlesip jumys jasaýǵa ýaǵdalasty, — dep jazady ulttyq kompanııanyń baspasóz qyzmeti.
Jazda Energetıka mınıstrligi Qarashyǵanaqta gaz óńdeý zaýytyn salý jobasynyń ınvestıtsııalyq keleshegine qatysty sheshim 2025 jyldyń qazan-qarashasynda túpkilikti qabyldanatynyn málimdegen bolatyn. Qazan aıynda mınıstr Erlan Aqkenjenov Qarashyǵanaq gaz óńdeý zaýytyn salýǵa keminde 2,5 mlrd dollar kerek ekenin aıtty.
Al «QazaqGaz» ulttyq kompanııasy» aktsıonerlik qoǵamynyń basqarma tóraǵasy Álibek Jamaýov reseılik «Gazpromnyń» Orynbordaǵy zaýyty Qarashyǵanaq gazyn 2050 jylǵa deıin óńdeıtinin málim etken edi.