«QazMunaıGaz» «Qalamqas-teńiz» ben «Hazar» ken oryndaryn ıgerýge jańa seriktes qarastyrady
ASTANA. KAZINFORM – «QazMunaıGaz» kompanııasy «Qalamqas-teńiz» ben «Hazar» ken oryndaryn ıgerýge jańa seriktester qarastyrady. Bul týraly GECA 2026 halyqarlyq geologııalyq forýmy aıasynda «QazMunaıGaz» UK» AQ basqarma tóraǵasynyń birinshi orynbasary Qurmanǵazy Esqazıev aıtty.
- Lýkoılda sanktsııada. Biz sanktsııany eskere otyryp, jobadan shyǵý nusqalaryn qarastyramyz. Sanktsııa bolǵandyqtan ary qaraı qalaı jumys isteısiń... Sondyqtan da sanktsııalar sharttardy qaperge alyp, jobany ary qaraı qalaı damytý joldaryn izdeýdemiz. Ken ornynyń tezirek iske qosylǵanyna múddelimiz. Sebebi tehnologııalyq, ekonomıkalyq sheshimderden bólek áleýmettik te úlken mańyzy bar, - dedi ol agenttik tilshisiniń saýalyna oraı.
Onyń aıtýynsha, qazaqstandyq verfte platforma salý Mańǵystaý oblysyna qosymsha 2 myńǵa deıin jumysshy kúshin tartýǵa múmkindik beredi.
- Sol sebepti jobany jyldam damytýǵa barynsha qyzyǵýshylyq tanytamyz. Biraq seriktesimiz sanktsııaǵa ilikkennen keıin biz osyny eskere otyryp, jobany ary qaraı jalǵastyramyz. Munyń ózge seriktestermen birge júzege asyrylýy múmkin ekeni túsinikti. Áli kelissóz júrgize qoıǵanymyz joq, biraq qarastyramyz. Sondyqtan aldyn ala eshteńe aıta almaımyn, - dedi Qurmanǵazy Esqazıev.
Buǵan deıin Energetıka vıtse-mınıstri Sanjar Járkeshov sanktsııaǵa ilikken«Lýkoıldyń» Qazaqstandaǵy jobalary týraly pikir bildirgen edi.
