«QazMunaıGaz» geologııalyq barlaý jumystaryn 2012-2016 jyldary damytý perspektıvasy máseleleri boıynsha keńes ótkizdi
ASTANA. 2 jeltoqsan. QazAqparat - «QazMunaıGaz» UK» AQ-nyń Basqarma tóraǵasy Bolat Aqsholaqov jáne atalǵan kompanııanyń barlaý jáne óndirý jónindegi basqarýshy dırektory Alık Aıdarbaev QMG kompanııalar tobynyń keńeıtilgen keńesin ótkizdi. Onda geologııalyq barlaý qyzmetiniń 2011 jylǵy qorytyndysy shyǵaryldy jáne 2012-2016 jyldarǵa arnalǵan josparlar qaraldy,
dep habarlady kompanııanyń baspasóz qyzmetinen.
Keńeste «QazMunaıGaz» UK AQ jáne enshiles uıymdarynyń geologııa salasynyń qyzmetkerleri, elimizdiń ǵylymı jurtshylyǵynyń ókilderi qatysty.
2008 jyldan 2011 jylǵa deıin geologııalyq-barlaý jumystaryna, sonyń ishinde burǵylaý jáne seısmıkalyq-barlaýǵa 121 mlrd. teńgeden astam qarajat jumsalǵany aıtyldy.
Al 2012-2016 jyldar kezeńinde geologııalyq-barlaý jumystaryna 557 mlrd. teńgeden astam qarajat, sonyń ishinde 435 izdestirý-barlaý uńǵymalaryn burǵylaýǵa jáne 12024 sharshy shaqyrym 3D kólemindegi seısmıkalyq barlaýǵa 499 mlrd. teńge jumsaý josparlanyp otyr.
Kaspıı teńiziniń qazaqstandyq sektoryndaǵy jobalarda («N», «Jambyl», «Sátbaev», «Mahambet», «Bóbek» jáne t.b.) burǵylaý, izdestirý-barlaý uńǵylarynyń aýqymdy kólemi josparlanyp otyr. Sonymen qatar jańa ınvestıtsııalyq jobalar («Abaı», «Isataı», «Shaǵala», «Ústirt») boıynsha jumys bastalmaqshy.
«Geologııalyq qyzmettiń rólin arttyrý, geologııalyq beıindi mamandar daıyndaý, jańa geologııa-geofızıkalyq jáne geologııalyq-kásipshilik zertteýlerdi damytý mańyzdylyǵyn asyra baǵalaý qıyn. Biz Qazaqstannyń iri munaı-gaz jobalaryndaǵy jobalyq sheshimderdiń iske asyrylýynyń geologııalyq monıtorıngin kúsheıtýimiz kerek», - dedi Bolat Aqsholaqov.
Keńes barysynda «QazMunaıGaz» UK AQ kompanııalar tobynyń geologııalyq qyzmetteriniń keńesi barysynda «QazMunaıGaz» UK AQ bas geology Q.Isqazıev, «Qazaq munaı-gaz ınstıtýty» AQ bas dırektory Uzaqbaı Qarabalın, «QazMunaıTeńiz» TMK» AQ barlaý jobalary jónindegi basqarýshy dırektory Aǵzam Qýdranov, «Merıdıan Petroleým» kompanııasynyń prezıdenti Baltabek Qýandykov baıandama jasady.
Keńes qorytyndysy shyǵarylyp, geologııalyq barlaýda ǵylymı-zertteý jáne tájirıbelik-konstrýktorlyq jumystardy kúsheıtý, taldamaly-túsindirý ortalyǵyn qurý, kern materıaldarynyń zerthanalyq zertteýleriniń, tıimdi geologııalyq-tehnıkalyq sharalardy jolǵa qoıý maqsatynda uńǵymalar zertteýleriniń kólemin ulǵaıtý jóninde sheshim qabyldandy.
