Qazmunaıgaz gaz óndirisin eki esege jýyq arttyrady
ASTANA. KAZINFORM — «QazMunaıGaz» UK AQ basqarma tóraǵasy Ashat Hasenov Úkimet otyrysynda taýarlyq gaz óndirisin ulǵaıtý boıynsha júrgizilip jatqan jumystar týraly baıandady.
Onyń aıtýynsha, Prezıdenttiń jańa gaz ken oryndaryn iske qosý jáne gaz óńdeý qýattaryn damytý jónindegi tapsyrmalaryn oryndaý úshin keshendi jumystar júrgizilip jatyr.
Josparly kórsetkishterge sáıkes, 2030 jylǵa deıin QazMunaıGazda taýarlyq gaz óndirisi jylyna 2,4-ten 4,5 mlrd tekshe metrge deıin ósedi. Atalǵan kezeńde suıytylǵan munaı gazyn óndirý 1,3 mln tonnadan 1,5 mln tonnaǵa deıin artady.
— Bul kórsetkishterge jetý úshin Batys Qazaqstan oblysyndaǵy Rojkovskoe jobasynyń ekinshi kezeńi júzege asyrylyp keledi. Ol 2028 jyly aıaqtalyp, gaz óndirý kólemin jylyna 700 mln tekshe metrge deıin ulǵaıtpaq. Gazdy óńdeýmen «Jaıyqmunaı» kompanııasy aınalysady. Al Atyraý oblysyndaǵy Batys Prorva jobasynyń birinshi kezeńi 2025 jylǵy jeltoqsanda iske qosyldy. Qazir 200 mln tekshe metr gaz óndirilise, 2027 jyly bul kórsetkishti 920 mln tekshe metrge deıin arttyrý kózdelip otyr. Munda Borankól gaz óńdeý zaýyty jumys isteıdi, — dedi A. Hasenov.
Aqtóbe oblysyndaǵy Ortalyq Óriktaý jobasy boıynsha sáýir aıynda «SNPS-Aqtóbemunaıgaz» kompanııasynyń Jańajol gaz óńdeý zaýytymen gaz protsessıngin júrgizý jóninde kelisim ornady. Jyl sońyna deıin óndiris kólemin jylyna 200 mln tekshe metr shıki gazǵa deıin jetkizý, al 2027 jyly bul kórsetkishti jylyna 1 mlrd tekshe metrge deıin arttyrý josparlanyp otyr.
— Jobalardy júzege asyrý kezinde gazdy ken oryndaryna jaqyn ornalasqan gaz óńdeý zaýyttarynda óńdeý múmkindikteri eskeriledi. Mundaı klasterlik tásil ken oryndaryn iske qosý merzimin qysqartyp, ınfraqurylymǵa ketetin shyǵyndardy azaıtady jáne Memleket basshysynyń tapsyrmasyna sáıkes eldegi bos turǵan óńdeý qýattaryn júkteýdi qamtamasyz etedi. Osylaısha, joǵaryda atalǵan ınvestıtsııalyq jobalardy júzege asyrý jylyna qosymsha 2,1 mlrd tekshe metr taýarlyq gaz jáne 250 myń tonna suıytylǵan gaz shyǵarýǵa múmkindik beredi, — dedi QMG basshysy.
Aıta keteıik, Qazaqstanda gazdandyrý deńgeıi 64,2% jetti. Taýarlyq gazdyń resýrstyq bazasyn ulǵaıtý maqsatynda jańa ken oryndaryn ıgerý josparlanyp otyr.
2035 jylǵa qaraı qazaqstandyqtardyń 80 paıyzy tabıǵı gazǵa qol jetkizetini habarlandy.
