QazMunaıGaz «Galatasaraı» fýtbol klýbymen kelisimshartqa otyrǵan joq

ASTANA. QazAqparat - «QazMunaıGaz» ulttyq kompanııasy «Galatasaraı» fýtbol klýbymen kelisimshart jasasqany týraly qaýesetti joqqa shyǵardy, dep habarlaıdy QazAqparat.

Aıta keteıik, áleýmettik jelilerde jáne keıbir buqaralyq aqparat quraldarynda «QazMunaıGaz» túriktiń «Galatasaraı» fýtbol klýbymen kelisimge keldi degen aqparat tarady.

Onda kelisimshart quny - 7,5 mln dollar, al onyń merzimi 5 jylǵa sozylatyny kórsetilgen.

Alaıda aktsıonerlik qoǵam bul málimetke senbeýge shaqyrady.

«Áleýmettik jelilerde taraǵan «QMG Ystanbuldyń «Galatasaraı» fýtbol klýbymen kelisimshartqa otyrdy» degen aqparattyń shyndyqqa janaspaıtynyn málimdeımiz» delingen kompanııanyń baspasóz qyzmeti taratqan habarlamada.

Eske sala keteıik, munyń aldynda «Eır Astana» áýe kompanııasy da túriktiń Beshıktash (Beşiktaş) fýtbol klýbyna demeýshilik kómek usynbaǵanyn aıtyp, jelidegi aqparatty teriske shyǵaryp edi.