QazMunaıGaz fermerlerge berilgen dızel otynyna qatysty jaǵdaıdy túsindirdi
PETROPAVL. KAZINFORM - «QazMunaıGaz» kompanııasy bolashaqta tómen temperatýrada qoldanýǵa arnalǵan dızel otynyn erterek berýdi qarastyrmaqshy.
«QazMunaıGaz» kompanııasy baspasóz qyzmetiniń málimetinshe, eldegi munaı óńdeý zaýyttarynyń (MÓZ) óndiristik qyzmeti, sonyń ishinde jazǵy, maýsymaralyq jáne qysqy dızel markalaryna kóshý — bekitilgen josparǵa saı júzege asyrylady. Bul shara ishki naryqtyń aldaǵy maýsymdaǵy qajettiligin qamtamasyz etýge baǵyttalǵan.
- Qyrkúıek aıynyń óndiristik josparyna sáıkes, otandyq zaýyttar 1 qazanǵa deıin jazǵy markaly dızel otynyn óndirdi. Shildeden bastap soltústik oblystarǵa dızel otyny qalyptasqan tájirıbe aıasynda Atyraý jáne Pavlodar munaı óńdeý zaýyttarynan jetkizilip keldi. Salalyq ýákiletti organnyń ótinishi boıynsha, aldaǵy ýaqytta «QazMunaıGaz» tómen temperatýraǵa beıimdelgen dızel otynyn erterek óndirýdi qolǵa alýǵa daıyn, — delingen habarlamada.
Qazirgi ýaqytta óndiristik protsester aýa raıyn eskere otyryp retteldi. Qazan aıynyń basynan Pavlodar jáne Shymkent munaı óńdeý zaýyttary –5°C temperatýraǵa deıin qoldanýǵa bolatyn maýsymaralyq dızel otynyn shyǵara bastady.
- Atyraý munaı óńdeý zaýyty josparly jóndeý jumystary aıaqtalǵannan keıin, ıaǵnı bıylǵy 25 qazannan soń –15°C jáne odan tómen temperatýrada paıdalanýǵa arnalǵan dızel otynyn óndirýdi josparlap otyr, - deıdi kompanııa ókilderi.
El boıynsha kúzgi dala jumystaryna barlyǵy 422,1 myń tonna dızel otyny bólingen. Onyń ishinde: Atyraý MÓZ-inen – 183,4 myń tonna, Pavlodar MÓZ-inen – 174,3 myń tonna, Shymkent MÓZ-inen – 64,4 myń tonna jetkizildi.
Soltústik óńirlerdiń sharýalaryna: Qostanaı oblysyna – Atyraýdan 57 myń tonna, Pavlodardan 28,5 myń tonna; Aqmola oblysyna – Atyraýdan 51,1 myń tonna, Pavlodardan 33,3 myń tonna jáne Soltústik Qazaqstan oblysyna – Atyraýdan 56,1 myń tonna, Pavlodardan 12,5 myń tonna bólingen.
Jalpy, QazMunaıGazdyń málimdeýinshe, otandyq munaı óńdeý zaýyttarynyń ónimi tehnıkalyq reglament talaptaryna tolyq sáıkes keledi.
Eske salaıyq, buǵan deıin Aqmola oblysynyń fermerleri dızel otynynyń sapasyna shaǵymdanǵan edi.
Alǵashqy sýyq túsken kezde dızel otyny parafınge aınalyp, tehnıka júrmeı qalǵan.