«QazMunaıGaz» eldegi benzın qoryna qatysty túsinikteme berdi
«Tolyqtaı alǵanda «QazMunaıGazdyń» janarmaı quıý beketterine benzın jetkizý turaqtanyp keledi. Eger ótken aptanyń basynda tek úsh oblysta ǵana munaı ónimderin erkin satýǵa múmkindik bolsa, qazirgi ýaqytta Qazaqstannyń 8 óńirinde ónimder erkin satylyp jatyr. Alty óńirde munaı ónimderin erkin, biraq bir qolǵa 20 lıtrden artyq emes kólemde satýǵa múmkindik beretin kólem bar», - dedi «QazMunaıGaz ónimderi» JShS-nyń damý jónindegi basqarýshy dırektory Baqytjan Tasanbaev BAQ ókilderine bergen suhbatynda.
Onyń aıtýynsha, Ońtústik Qazaqstan men Aqmola oblystarynda benzın kartamen ǵana berýde. Degenmen, bul óńirlerge taıaý kúnderi jetkilikti kólemde benzın jetkiziletin bolady.
Sonymen qatar B.Tasanbaevtyń sózine qaraǵanda, elordada benzın erkin satylyp jatyr. AI-92 benzıniniń 2 myń tonnadan astam qaldyǵy bar. Buǵan qosa, Reseıden 2 myń tonnadan astam benzın ımporttalǵan. Jolda shamamen 800 tonna benzın kele jatyr. Tolyqtaı alǵanda, qazirgi ýaqytta «QazMunaıGazdyń» janarmaı quıý beketterinde 8-10 myń tonna munaı ónimderi bar.
«Qazaqstan boıynsha AI-92 benzıniniń 12 myń tonnasy jolda kele jatyr jáne atalǵan kelim jetkizilgennen keıin erkin rejımde satylatyn bolady. Buǵan qosa, qazirgi ýaqytta zaýyttardyń birinde jóndeý jumystarynyń júrgizilip jatqanyn jáne ımporttyń qajet ekendigin eskere otyryp, «QazMunaıGaz ónimderi» reseılik benzınniń 45 myń tonnasyn ımporttaý týraly shart jasasty. Onyń negizgi bóligi osy aptanyń ishinde jetkiziledi. Jalpy, qazaqstandyq jáne reseılik shamamen 60 myń tonna munaı ónimderi jetkiziledi dep kútýdemiz», - dedi ol.
