«QazMunaıGaz» el Úkimetine metaldan quıylǵan sý qubyrlaryn polımerge aýystyrýdy usyndy

ASTANA. KAZINFORM — «QazMunaıGaz» ulttyq kompanııasy basqarma tóraǵasynyń orynbasary Áset Maǵaýov Úkimetke quıylǵan sý qubyrlarynyń bárin polımerge aýystyrýdy usyndy.

— Plastmassa ónimderin óndirý boıynsha ishki naryqty yntalandyrý — munaı-gaz hımııasyn odan ári damytýdyń negizgi máseleleriniń biri bolyp esepteledi. Óıtkeni munaı ónimderiniń ımporty 2024 jyly 3,4 mlrd dollar boldy.  «QazMunaıGaz» janynan ishki naryq pen polımer materıaldardyń qoldanysyn keńeıtý jónindegi jobalyq keńse quryldy. Búgingi tańda basqa elderden sertıfıkattalmaǵan, shıkizattyń shyǵarylǵan jeri kórsetilmegen polımer ónimderdiń ákelinip jatqany baıqalady, — dedi Áset Maǵaýov Úkimet otyrysynda.

Sondaı-aq, ol el ekonomıkasynda zamanaýı polımer áli de bolsa sırek qoldanylatynyn atap ótti.

— Buǵan qosa, ekonomıka salalarynda áli de dástúrli materıaldar qoldanylyp keledi. Bul rette joǵary senimdiligimen, tózimdiligimen ári ıkemdiligimen erekshelenetin zamanaýı polımerge aýysatyn ýaqyt keldi jáne oǵan obektıvti negiz bar. Mysaly, sý qubyrlaryn metaldan polımerlerge aýystyrýǵa bolady, — dedi «QazMunaıGaz» ókili.

Sondaı-aq, ol munaı baǵasy bıyl 65 dollar deńgeıinde saqtalýy múmkin degen boljam aıtty.