QazMunaıGaz-dyń qoldaýymen Mańǵystaý oblysynda úsh tirek mektep tolyq jabdyqtaldy
ASTANA. KAZINFORM — «Otpan» jobasy boıynsha Mańǵystaý oblysynda shalǵaı aýyldarda ornalasqan tirek mektepterdi damytý boıynsha jumys júrgizilýde.
Atap aıtqanda, «QazMunaıGaz» UK AQ qoldaýymen Taýshyq (Túpqaraǵan aýdany), Jetibaı (Qaraqııa aýdany) jáne Rahat (Jańaózen qalasy) aýyldarynyń mektepterinde 50-den astam oqý kabıneti men bilim berý keńistigi jańartyldy.
Negizgi pánder boıynsha kabınetter, bastaýysh synyptary, tehnologııalyq sheberhanalar, sondaı-aq hımııa, fızıka jáne bıologııa pánderine arnalǵan tsıfrly zerthanalar jańǵyrtyldy.
Oǵan qosa, túrli úıirmelerdi júrgizýge jaǵdaı jasaldy. Úsh tirek mektepte robot tehnıkasy kabınetteri, STEM-zerthanalar, art jáne telestýdııalar, sondaı-aq oqýshylarǵa arnalǵan demalys oryndary ashyldy. Bul mektepterde 3,5 myńnan astam oqýshy bilim alady, al ujymda 380 pedagog qyzmet etedi.
Taýshyq, Jetibaı jáne Rahat aýyldaryndaǵy mektepterge jergilikti turǵyndar, munaı-gaz salasynyń ardagerleri men QMG ókilderi arnaıy keldi.
— «QazMunaıGaz» «Otpan» jobasyna belsendi qatysyp, óńirdiń shalǵaı aýyldarynda bilim berýdi damytýǵa jan-jaqty qoldaý kórsetýde. Oqý oryndaryn jańǵyrtý oqýshylardyń zamanaýı tehnologııalar men qosymsha bilim berý múmkindikterine qol jetkizýine jol ashady. Jalpy, QMG qyzmetin júrgizetin óńirlerde áleýmettik jobalardy turaqty negizde iske asyryp keledi, — dep atap ótti «QazMunaıGaz» UK AQ Basqarma tóraǵasynyń orynbasary Bekzat Abaıyldanov.
Taýshyq aýylynyń týmasy, «QazMunaıGaz» ulttyq kompanııasynyń tuńǵysh prezıdenti Lázzat Qıynovtyń ata-anasy osy mektepte muǵalim bolyp eńbek etken. Ardager munaıshy óz kezeginde mundaı bastamalardyń, ásirese aýyldyq jerlerde bilim berý ınfraqurylymyn damytýdyń mańyzyn atap ótti.
— Bilim — qoǵam damýynyń kepili. «Otpan» jobasy arqyly aýyl balalarynyń oqý jaǵdaıy qanshalyqty jaqsaryp jatqanyn kórgenime qýanyshtymyn. Mundaı bastamalar arqyly balalarymyzdyń jarqyn bolashaǵyna jol ashatynymyzǵa senimdimin, — dedi munaı-gaz salasynyń ardageri L.Qıynov.
Úkimet bastamasymen bıyl sáýir aıynda bastaý alǵan «Otpan» jobasy bilim berý sapasyn arttyrýǵa baǵyttalǵan. Jobaǵa Mańǵystaý oblysynyń 50 mektebi qatysady, bul mektepterde 60 myń oqýshy oqyp, 7 myń pedagog jumys isteıdi. Jobany Bilim berý salasyn turaqty damytý qory iske asyrady. Qor 2019 jyldan bastap elimizde tirek mektepter jelisin qurýmen belsendi aınalysady. Joba aıasynda «Nazarbaev zııatkerlik mektepteri» DBBU men «Bilim-ınnovatsııa» HQQ tájirıbesi negizinde muǵalimderdi oqytý jáne tájirıbe almasý uıymdastyrylady, sondaı-aq mektepterdiń materıaldyq-tehnıkalyq bazasy jańartylady.
Buǵan deıin QazMunaıGaz Oral turǵyndary úshin jańa sport keshenin salǵanyn jazdyq.