«QazMunaıGaz» ben Turkish Petroleum Corporation geologııalyq barlaý jáne óndiris salasynda yntymaqtaspaq
ASTANA. KAZINFORM — «QazMunaıGaz» ben Turkish Petroleum Corporation kompanııalary geologııalyq barlaý jáne óndiris salasyndaǵy yntymaqtastyq máselesin talqylap jatyr.
Bul týraly Úkimet úıinde Túrkııa Vıtse-prezıdenti Jevdet Iylmazben Saýda-ekonomıkalyq yntymaqtastyq jónindegi komıssııanyń 14-otyrysyn ótkizip jatqan Premer-mınıstr Oljas Bektenov aıtty.
— Energetıkalyq seriktestikti damytý ózara árekettesýdiń mańyzdy baǵyty jáne aımaqtyq turaqtylyqtyń tiregi sanalady. Baký-Tbılısı-Jeıhan baǵyty qazaqstandyq munaıdy jetkizý úshin mańyzdy qubyrlyq ınfraqurylymnyń bóligi. Túrik kompanııalary Qazaqstanda munaı-gaz salasyndaǵy iri jobalardy sátti júzege asyryp jatyr. Budan basqa, taraptar bul salada ınvestıtsııalyq kelisimder jasaýǵa basa nazar aýdaryp otyr. Mysaly, «QazMunaıGaz» jáne Turkish Petroleum Corporation kompanııalary geologııalyq barlaý jáne óndiris salasyndaǵy yntymaqtastyqty talqylap jatyr, — dedi Úkimet basshysy.
Premer-mınıstrdiń paıymynsha, elektr energetıkasy, kómir ónerkásibi jáne taǵy basqa salalardaǵy eki eldiń sarapshylary ınnovatsııalardy engizý boıynsha tájirıbe almasýlary qajet.
— Qazirgi tańda AKSA Energy kompanııasy Qyzylordada qýattylyǵy 240 MVt bý-gaz qondyrǵysyn salyp jatyr. Bul rette biz ózara tıimdi qatynasty eń keń aýqymda keńeıtýge jáne jańa usynystarǵa ashyqpyz, — dedi Oljas Bektenov.
Aıta keteıik, Qazaqstan túrik ınvestorlaryna birlesken jobalardy iske asyrý úshin memlekettik qoldaý quraldaryn usynýǵa daıyn.
