«QazMunaıGaz» ben reseılik «SIBÝR» kásiporny ózara baılanys ornatýǵa nıetti

Qos tarap aldaǵy ýaqytta munaı, hımııa jáne gaz salasyndaǵy jobalardy birge júzege asyrýy múmkin.

«QazMunaıGaz» ulttyq kompanııasy» AQ basqarma tóraǵasy Maǵzum Myrzaǵalıev bastaǵan qazaqstandyq delegatsııa Reseıdegi «SIBÝR» kompanııalar tobyna kiretin birneshe kásiporynǵa arnaıy baryp, sheteldik áriptesterdiń qyzmetin baıqady.

Atalmysh kompanııa - polıpropılen, tómen qysymdaǵy polıetılen, bıoksıaldy baǵyttalǵan polıpropılendi plenkalar, termoplastıkalyq polımer, kópiretin polıstırol, termoelastoplast shyǵaratyn Reseıdegi eń iri óndirýshi.

Oǵan qosa, polıolefın daıyndaý boıynsha álemdegi úzdik bestiktiń quramyna kiredi.

Aldymen «QazMunaıGaz» ókilderi Reseıdiń Tobyl qalasynda ornalasqan iri óndiris oryndarynyń biri – «ZapSıbNeftehım» kompanııasynyń jumys barysymen tanysty.

«Sıbýr Holdıng» tobynyń munaı-hımııa kombınaty shyǵaratyn ónim álemdik naryqta joǵary suranysqa ıe. Munda jylyna 1,5 mln tonna polıetılen men 1 mln tonna polıpropılen shyǵarylady.

Qazaqstandyq delegatsııa jylyna barlyǵy 2,5 mln tonna bazalyq polımer shyǵaratyn osy kásiporynǵa qarasty pırolız, polıetılen, polıpropılen qondyrǵylary ornalasqan óndiris oryndarynda boldy.

Sondaı-aq, ortalyq operatorlyq qyzmettiń negizgi baǵyttaryn baıqady. Bul ortalyqta búginde tsıfrlyq quraldar keńinen qoldanylady.

Odan soń «QazMunaıGaz» kompanııasy qyzmetkerleri monomerlik óndiris nysanyna baryp qaıtty.

Onyń ishinde maleındi angıdrıdti shyǵaratyn qondyrǵy, propandy degıdrıdteý, jeńil kómirsýtektiń keń fraktsııasyn óńdeý boıynsha óndirister bar.

Sondaı-aq, qazaqstandyq tarap monomerlerdi shyǵarý zaýytynyń biryńǵaı óndiristik operatorlyq ortalyǵy men «SIBÝRINTEH» ınjenerlik-tehnıkalyq saraptamany damytý ortalyǵynyń qyzmetimen tanysty.

Jumys sapary sońynda «QazMunaıGaz», «Sıbýr» jáne beınekonferentsııa baılanysy arqyly qosylǵan Sinopec kompanııalary basshylarynyń qatysýymen jıyn ótti.

Basqosý barysynda kompanııalar arasyndaǵy áriptestik baılanys pen munaı, hımııa jáne gaz salalarynda aldaǵy ýaqytta júzege asýy múmkin birlesken jobalar talqylandy.

Eske sala keteıik, ótken jyldyń qazan aıynda «Samuryq-Qazyna» ulttyq ál-aýqat qory, «QazMunaıGaz» ulttyq kompanııasy jáne «Sıbýr» kompanııalar toby arasynda polıetılen men polıpropılen shyǵaratyn zaýyttardy salýǵa qatysty kelisim jasalǵan bolatyn.