«QazMunaıgaz» ben KAZENERGY jýrnalıster arasynda baıqaý jarııalady
ANA. 12 shilde. QazAqparat /Qanat Mámetqazyuly/ - «QazMunaıGaz» UK AQ men KAZENERGY qaýymdastyǵy qazaqstandyq jýrnalısterdiń shyǵarmashylyq belsendiligin arttyrýdy kózdeıtin «Qalam qýaty» atty 3-shi respýblıkalyq jýrnalıstik sheberlik baıqaýyn jarııalaıdy.
Baıqaýdyń negizgi maqsaty Qazaqstan Respýblıkasy munaı-gaz salasynyń jetistikterine jurtshylyqtyń nazaryn aýdarý, Qazaqstan munaı-gaz salasy kompanııalarynyń aqparattyń ashyqtyǵy boıynsha qyzyǵýshylyǵyn arttyrý, munaı-gaz taqyrybynda qalam terbeıtin elimizdiń BAQ-tary arasynda adal básekelestikti qoldaý, sonymen qatar biryńǵaı medıa keńistigi úlgisin jasaý bolyp tabylady.
Baıqaýǵa respýblıkalyq, oblystyq jáne qalalyq, aýdandyq gazetterdiń redaktsııa ujymdary, teleradıokompanııalar, aımaqtyq jáne respýblıkalyq BAQ-tarda isteıtin jeke izdenýshiler - jýrnalıster, (shtattaǵy jáne shtattan tys qyzmetkerler), sonymen qatar materıaldary jaryq kórgen ne bolmasa tele- jáne radıohabarlarynda paıdalanylǵan basqa da avtorlar qatysa alady. Bul joly «Qalam qýaty» mynadaı atalymdar boıynsha ótkiziledi:
- Gran-prı;
- respýblıkalyq telearnada efırge shyqqan munaı-gaz taqyrybyndaǵy úzdik TV baǵdarlama/ arnaıy reportaj;
- úzdik fotoreportaj;
- úzdik radıobaǵdarlama;
- respýblıkalyq BAQ-ta jaryq kórgen úzdik materıal;
- aımaqtyq baspa BAQ-tarynda qazaq tilinde jaryq kórgen úzdik materıal;
- aımaqtyq baspa BAQ-tarynda orys tilinde jaryq kórgen úzdik materıal;
- úzdik stýdenttik jumys;
- úzdik blogger;
- munaı-gaz salasy tarıhy týraly úzdik materıal.
Baıqaýǵa jańa atalymdar engizý munaı-gaz taqyrybynda qalam terbeıtin jýrnalıster arasynda new-media (bloggıng, mobıldi jýrnalıstıka) progressıvti túrlerin taratýǵa, sonymen qatar BAQ-tardaǵy jas mamandardyń munaı-gaz taqyrybynda materıaldar jazýyna múmkindik beredi. Konkýrsqa 2011 jyldyń qańtar aıynyń 1 juldyzynan 2011 jyldyń 20 tamyzyna deıin gazetterde jáne basqa da tirkelgen BAQ-tarda, sondaı-aq Internet BAQ-tarynda jaryq kórgen, tele-radıoda efırge shyqqan materıaldar qabyldanady. Ótinimder 2011 jyldyń 25 tamyzyna deıin qabyldanady.
Baıqaý týraly tolyǵyraq aqparat pen oǵan qatysýdyń sharttary jaıly www.kmg.kz jáne www.kazenergy.com saıttarynan oqı alasyzdar.
