Ashat Hasenov Jańaózendegi ereýil týraly: Eshkimge qysym kórsetip jatqan joqpyz

ASTANA. KAZINFORM – «Qazmunaıgaz» kompanııasynyń basqarma tóraǵasy Ashat Hasenov «Ózenmunaıgaz» kompanııasyna qarasty Burǵylaý basqarmasynyń ereýilge shyqqan jumysshylary qashan tolyq jumysqa oralatynyn aıtty.

BAQ ókilderimen kezdesýde jýrnalıster kompanııa basshysynan talaptary oryndalmaǵandyqtan jumysqa shyǵýdan bas tartqan jumysshylardyń endigi taǵdyry ne bolatynyn surady.

«Qazirgi aqparat boıynsha 160 adamnyń ishinde 19-y jumysqa shyqty. ıAǵnı, 141 adam jumysqa shyqpaı jatyr. Jalpy «ÓzenMunaıGazdy» aıtsaq, 4770 adamnyń ishinde 4630 adam qazir jumysta. Biz olarǵa eshqandaı ýaqyt qoıyp otyrǵan joqpyz. Únemi aıtyp jatyrmyz. Qazirgi aktsııa durys emestigin túsindirip, olardy jumysqa qosylýǵa shaqyryp jatyrmyz. ıAǵnı, olar mindetterin tolyq atqarý kerek», - dedi ol.

BAQ ókilderi «Ereýilge qatysqan jumysshylardyń jumys berýshi tarapynan qysym jasalyp jatqany týraly málimdemesinen keıin ishki tekserýler júrgizilip jatyr ma?» - degen suraq qoıdy.

«Eshqandaı ishki qysym joq. Ony men sizge resmı aıtyp otyrmyn. Kúndelikti kezdesip, ashyq jumys istep otyrmyz. Bir ǵana mekemeniń ózinde 37 odaq, 3 úlken kásipodaq bar. Jumysqa shyǵý qajet. Qosymsha bir usynystar, eskertýler bolsa, biz olardy eshqashan shektemeımiz. Tikeleı dıalogqa daıynbyz», - dedi Ashat Hasenov.

Resmı derek boıynsha Jańaózendegi munaıshylardyń sońǵy ereýiline alǵashqy kúnderi 1 700 adam qatysqan.