«QazMunaıGaz» basshylyǵynda birqatar kadrlyq ózgeris boldy
ASTANA. KAZINFORM - «QazMunaıGaz» UK AQ (QMG) Basqarma tóraǵasynyń orynbasary Dáýletjan Hasanov 2024 jyldyń 30 qańtarynan bastap qyzmetinen ketti. Sondaı-aq, ol «QazMunaıGaz» UK AQ Aqtaý qalasyndaǵy ókildiginiń dırektory laýazymyndaǵy jumysyn da aıaqtady.
Bul týraly «QazMunaıGaz» UK AQ baspasóz qyzmetinen málim boldy.
QMG Basqarma Tóraǵasy Maǵzum Myrzaǵalıev uzaq jylǵy qajyrly eńbegi men kompanııanyń damýyna qosqan eleýli úlesi úshin D.Hasanovqa alǵys bildirdi. D.Hasanov QMG-da túrli basshylyq qyzmetter atqardy. QMG Basqarma tóraǵasynyń orynbasary retinde munaı barlaý jáne óndirý blogyna jetekshilik etti.
Nurseıit Soıýnov «QazMunaıGaz» UK AQ Basqarma tóraǵasynyń orynbasary qyzmetine taǵaıyndaldy, sondaı-aq oǵan «QazMunaıGaz» UK AQ Aqtaý qalasyndaǵy ókildigi dırektorynyń mindetteri qosa júkteldi. Buǵan deıin N.Soıýnov «Qarajanbasmunaı» AQ Bas dırektory qyzmetin atqarǵan. Ár jyldary «Ózenmunaıgaz» AQ, «QazMunaıGaz» BÓ» AQ, «Ózenmunaıservıs» JShS, «Ýral Oıl end Gaz» JShS mekemelerinde basshylyq qyzmetter atqarǵan. Eńbek jolyn 2001 jyly «Ózenmunaıgaz» AQ operator bolyp bastaǵan.
