«QazMunaıGaz» basshylyǵy ereýilshilerdiń talaptaryna jaýap berdi
ASTANA. KAZINFORM – «Qazmunaıgaz» UQ» AQ «Westoil Software» mekemesindegi zańsyz ereýilge qatysýshylarmen arada júrgizilgen kelissózderdiń nátıjesi týraly aıtty.
«QazMunaıGaz» UK» AQ basqarma tóraǵasynyń orynbasary Nurseıit Soıýnov «West Oil Software» JShS-nyń zańsyz ereýiline qatysýshylarǵa beıneúndeý joldady. Óz úndeýinde ol kelissózder barysynda jumysshylardyń QMG quramyna qabyldaýdy, olardy ulttyq kompanııada qabyldanǵan biryńǵaı eńbekaqy tóleý júıesine ótkizýdi jáne kásiporynnyń jabdyqtaryn jańartýdy talap etkenin atap ótti.
QMG ereýilshilerdiń sońǵy talabymen kelisti, qural-jabdyqtar ázirlengen baǵdarlamaǵa sáıkes úsh jyl ishinde tolyq jańartylady.
Alaıda West Oil Software ujymyn «QazMunaıGaz» quramyna engizý jáne biryńǵaı eńbekaqy júıesine kóshý talaptary orynsyz jáne olardyń oryndalmaıtynyn jetkizdi.
Soıýnovtyń aıtýynsha, mekemeniń kólik parkin jańǵyrtý baǵdarlamasy júıeli júzege asyp, jyl sońyna deıin 70-ten astam tehnıkany jańartý josparlanǵan. Barlyǵy 200-den astam tehnıka jańartylmaq.
«Jumysshylar qoıǵan negizgi talaptarǵa sáıkes, mekemeniń qural-jabdyqtaryn jańartyp, joǵary sapaly eńbek jaǵdaıyn qamtamasyz etý maqsatynda úsh jyldyq merzimge 202 tehnıkany jańartý jospary bekitildi. Jańartý kestesine sáıkes kásiporynǵa jańa tehnıkalar kele bastady. 2023 jyly 17 tehnıka jáne 2024 jyldyń basynan bastap 4 tehnıka alynyp, iske qosyldy. Osy jyldyń sońyna deıin barlyǵy 70 tehnıkany jańartý josparlanýda. Sonymen qatar, qazir óndiristik ǵımaratty jańǵyrtýdyń jobalyq-smetalyq qujattamasy ázirlenýde», – dedi Nurseıit Soıýnov.
Sondaı-aq, Soıýnov aqpan aıynda ereýilden keıin qyzmetine qaıta oralýǵa sheshim qabyldaǵan 143 qyzmetkerge naýryz aıynda jalaqy tólengenin atap ótti. Olar esh kedergisiz, shtattyq rejımde jumysyn jalǵastyrýda.
«QazMunaıGaz» ókili zańsyz ereýilge qatysýshylardy jumys oryndaryna oralýǵa shaqyryp, jumyssyz qalýdyń tabyssyz qalýǵa ákep soǵatynyn atap ótti.
«Sizderge kúndelikti óndiriste ózderińizben jumys jasap, qaıtadan qyzmetterin bastaǵan 143 azamatpen birge bolyp, jumys oryndaryńyzǵa oralýǵa shaqyramyn. Sózge toqtaǵan tekti babalardyń urpaǵy, kıeli ólkeniń azamattary retinde eshbir arandatýǵa túspeı, jumysqa oralyp, adal tabys taýyp otyrǵan qyzmetterińizge bilek túre qaıta kirisý qajet dep sanaımyn», - dedi Nurseıit Soıýnov.
