«QazMunaıGaz» Barlaý Óndirý» AQ Ural Group Limited aktsııalarynyń 50 paıyzyn satyp aldy
ASTANA. 12 naýryz. QazAqparat - «QazMunaıGaz» Barlaý Óndirý» AQ Exploration Venture Limited (EVL) kompanııasymen «Ural Group Limited» (UGL) kompanııasyndaǵy 50 paıyz aktsııany satyp alý jóninde kelisimge qol qoıǵanyn habarlaıdy.
UGL Oral qalasynyń irgesinde jáne birqatar qoldanystaǵy iri ken oryndaryna jaqyn ornalasqan Fedorov blogynda kómirsýtekterin barlaý júrgizý quqyǵyna ıe «Ýral Oıl end Gaz» (ÝOG) JShS-niń 100 paıyz qatysý úlesiniń ıesi bolyp tabylady.
UGL-degi 50 paıyz aktsııany satyp alý quny 149,1 mln. AQSh dollaryn quraıdy jáne aktsııalar úshin 61,3 mln. AQSh dollaryn jáne aktsıonerlik zaımdar boıynsha (2010 jyldyń 1 qańtary kúngi jaǵdaı boıynsha) talap etý quqyǵy úshin 87,8 mln. AQSh dollaryn qamtıdy. Mámileniń sharttary boıynsha aktsıonerlik zaımdar kommertsııalyq óndirý bastalǵannan keıin QMG BÓ paıdasyna tólenedi. EVL kompanııasynyń jumys baǵdarlamalaryn mámile jabylǵan kúnge deıin qarjylandyrýyna baılanysty, aktsıonerlik zaımdar úshin syıaqylardyń túpkilikti baǵasy ózgertýge jatady. Mámile QMG BÓ óz qarjysy esebinen qarjylandyrylady.
ÝOG 2014 jylǵa deıingi merzimde qoldanystaǵy jáne odan ári kómirsýtegi shıkizattaryn óndirýge kelisim jasaý quqyǵy bar jer qoınaýyn paıdalaný kelisimshartyna sáıkes, Fedorov blogynda barlaý jumystaryn júrgizedi. 2008 jyly Fedorov blogynyń aýmaǵynda Rojkovskoe munaıgaz kondensatty ken orny tabyldy, qazirgi tańda ÝOG oǵan baǵalaý júrgizýde. QR Qorlar jónindegi memlekettik komıssııasy bekitken 2010 jyldyń sońyndaǵy qorlardyń esebine sáıkes, Fedorov blogynda S1+S2 sanaty boıynsha alynǵan gaz jáne kondensattyń jalpy qory 203,4 mln. barrel munaı balamasyn quraıdy. Fedorov blogynyń aýmaǵy arqyly Gazprom kompanııasynyń «Orynbor-Batys Eýropa» magıstraldi gaz qubyry ótedi. Odan bólek, Fedorov blogynyń janynan «Atyraý-Samara» ekporttyq magıstraldi munaı qubyry, sondaı-aq Kaspıı qubyr jelisi konsortsıýymynyń júıesi arqyly álemdik rynokqa shyǵýǵa múmkindik beretin «Qarashyǵanaq-Atyraý» qubyr jelisi ótedi.
QMG BÓ bas dırektory Kenjebek Ibrashev: «Biz Fedorov blogyn bolashaǵy zor iri aktıv retinde baǵalap otyrmyz. Atalǵan bloktyń úlesin satyp alý bizdiń belsendi damýǵa talpynyp otyrǵan jańa aımaqqa shyǵýymyzdy bildiredi. Bul mámile QMG BÓ barlaý aktıvteriniń qorjynyn sátti tolyqtyrady jáne belsendi geologııalyq barlaý esebinen qorlardyń artýyn jedeldetýge basymdyq berip otyrǵan Kompanııanyń strategııalaryn júzege asyrýdaǵy kezekti qadam bolyp tabylady», - deıdi.
Satyp alý QMG BÓ Dırektorlar keńesi men EVL Dırektorlar keńesiniń sheshimderimen bekitildi jáne memlekettik retteýshi organdardyń maquldaýyna jatady. Qazirdiń ózinde qajetti maquldaýlardyń birqatary alyndy. Qalǵan maquldaýlar alynǵannan keıin mámileni jabý kútilip otyr.
