«QazMunaıGaz» Barlaý Óndirý» AQ-nyń 2011 jylǵy taza paıdasy 209 mlrd. teńgeni qurady
ASTANA. 3 naýryz. QazAqparat - «QazMunaıGaz» Barlaý Óndirý» AQ-nyń ótken jyly munaı satýdan túsken paıdasy 2010 jylmen salystyrǵanda 19 paıyzǵa ósti, dep habarlady kompanııanyń baspasóz qyzmetinen.
«Munaı baǵasynyń aıtarlyqtaı ósýine jáne ishki naryqqa jetkizilim baǵasynyń joǵary bolýyna, ishinara ótelgen eksport kóleminiń tómendeýine baılanysty kirister 19 paıyzǵa ósip, 708 mlrd. tengeni (4 832 mln. AQSh dollary) qurady», - delingen habarlamada.
2011 jyly Brent markaly munaıdyń ortasha baǵasy 2010 jylmen salystyrǵanda, barreline 79 AQSh dollarynan 111 AQSh dollaryna deıin ósip, 41 paıyzǵa joǵary boldy. Bul rette taza paıda 209 mlrd. tengeni (1 425 mln. AQSh dollary) jáne bir aktsııaǵa shaqqandaǵy paıda 2 950 tengeni (bir JDQ úshin 3,4 AQSh dollaryn) qurap, 2010 jylmen salystyrǵanda sáıkesinshe 11 jáne 9 paıyzǵa azaıdy.
«Kompanııanyń ótken jyldaǵy nátıjelerine 2011 jyldyń mamyr-tamyz aılarynda oryn alǵan zańsyz narazylyq aktsııalarynyń nátıjesinde munaı óndirýdiń jáne eksporttyń tómendeýi, sondaı-aq 2010 jyly eksporttyq kedendik salyqtardyń engizilýi men 2011 jyly onyń mólsheriniń eki eselenýi áser etti», - delingen aqparatta.
