«QazMunaıGaz» Barlaý Óndirý» AQ-nyń 2011 jyldyń toǵyz aıyndaǵy taza paıdasy 165 mlrd. teńge boldy
TANA. 14 qarasha. QazAqparat - «QazMunaıGaz» Barlaý Óndirý» AQ-nyń 2011 jyldyń toǵyz aıyndaǵy taza paıdasy 165 mlrd. teńgeni qurady, dep habarlaıdy kompanııanyń resmı saıty.
Saıtta jarııalanǵan kompanııanyń jyldyń alǵashqy toǵyz aıyndaǵy qarjylyq nátıjelerindegi málimetterge qaraǵanda, bir aktsııaǵa shaqqandaǵy paıda 2 280 teńgeni qurap, 2010 jyldyń sáıkes kezeńimen salystyrǵanda tıisinshe 5 %-ǵa jáne 6 %-ǵa artqan.
Kompanııanyń 2011 jyldyń alǵashqy toǵyz aıyndaǵy nátıjelerine negizinen 2011 jyldyń mamyr-tamyz aılarynda«Ózenmunaıgaz» óndiristik fılıalynda bolǵan zańsyz narazylyq aktsııasy saldarynan munaı óndirý men eksporttyń kóleminiń azaıýy, 2011 jyldyń ekinshi toqsanynda aıyppuldar men ósimpuldardyń eseptelýi jáne salyqtardyń artýy áser etti.
2011 jyldyń alǵashqy toǵyz aıynda aktsıonerlik qoǵamnyń munaı satýdan túsken kirisi 2010 jyldyń sáıkes kezeńimen salystyrǵanda 23 %-ǵa artyp, 536 mlrd. teńgeni (3 669 mln. AQSh dollaryn) qurady. Buǵan munaıdyń ortasha satý baǵasynyń 38 %-ǵa - tonnasyna 67 170 teńgeden (barreline 63,05 AQSh dollarynan) 92 888 teńgege (barreline 87,89 AQSh dollaryna) deıin kóterilýi sebep boldy.
Brent markaly munaıdyń ortasha baǵasy 2011 jyldyń alǵashqy toǵyz aıynda ótken jyldyń osyndaı kezeńimen salystyrǵanda, barreline 77 AQSh dollarynan 112 AQSh dollaryna deıin kóterilip, 46 %-ǵa ósti.
