«QazMunaıGaz» Barlaý Óndirý» AQ qorlardy toltyrý koeffıtsıentin arttyrdy
ASTANA. 24 aqpan. QazAqparat - «QazMunaıGaz» Barlaý Óndirý» AQ 2010 jyldyń 31 jeltoqsanyndaǵy jaǵdaı boıynsha munaı qorlaryna júrgizilgen aýdıttiń nátıjelerin jarııalaıdy.
Gaffney, Cline & Associates («GCA») táýelsiz kompanııasynyń esebine sáıkes, «dáleldengen, yqtımal» (2R) sanaty boıynsha alynatyn munaı qorlary «Qazgermunaı» jáne CCEL («Qarajambasmunaı») jáne «PetroQazaqstan Ink.» kompanııalaryndaǵy QMG BÓ úlesin qospaǵanda, 232 mln. tonnany (1 707 mln. barrel) qurady. Ótken jyly Ózen jáne Embi ken oryndarynda qorlardyń ornyn toltyrý koeffıtsıenti 73 paıyz boldy, al 2009 jyly bul kórsetkish 25 paıyzǵa teń edi.
Qoldanystaǵy ken oryndaryn jete barlaý, jekelegen ken oryndarynda munaı alý koeffıtsıentin arttyrýdyń, sondaı-aq qolaıly makroekonomıkalyq konıýnktýranyń esebinen qorlardy toltyrýǵa qol jetkizildi. 2010 jyldyń 31 jeltoqsanyndaǵy jaǵdaı boıynsha qorlardyń eseligi 26 jyldy qurady.
Kompanııa ІRO-ǵa shyqqaly beri «dáleldengen, yqtımal» (2R) sanaty boıynsha alynǵan jalpy munaı qorlary 14 paıyzǵa artty, ІRO-ǵa shyqqaly bergi 5 jyl ishinde toltyrý koeffıtsıenti 178 paıyzǵa teńesti.
«Dáleldengen» (1R) sanaty boıynsha qorlar 82 mln. tonnany (600 mln. barrel), al «dáleldengen, yqtımal jáne múmkin bolatyn» (3R) sanaty boıynsha 266 mln. tonnany (1 955 mln. barrel) quraıdy.
Baspasóz qyzmetiniń atap ótýinshe, kompanııa resýrstyq bazany arttyrý baǵytyndaǵy jumystardy da jalǵastyrýda.
«2010 jyly ótkizilgen sharalar, atap aıtqanda, jańa uńǵymalardy qarqyndy burǵylaý, ıgerilip jatqan ken oryndaryna meılinshe tereń geologııalyq zertteýler júrgizý, buǵan deıin jumyssyz turǵan uńǵymalardy iske qosý bizge qorlardyń ornyn toltyrý koeffıtsıentiniń tómendeýin toqtatýǵa múmkindik berdi. Ózen jáne Embide ornalasqan eski ken oryndary úshin 73 paıyzdyq qorlardyń ornyn toltyrý, óte jaqsy nátıje bolyp tabylady. Sonymen qatar, bul taǵy da 2010 jyldyń jeltoqsanynda bekitilgen jańa damý Startegııasynyń basymdyqtarynyń biri retinde belgilengen geologııalyq barlaýdy damytý boıynsha kompanııanyń tańdaǵan baǵytynyń durystyǵyn dáleldeıdi. Biz qolaıly baǵa konıýnktýrasy men qolaıly syrtqy jaǵdaılar saqtalǵan jaǵdaıda geologııalyq barlaý jumystaryna aıtarlyqtaı qarajat salýǵa nıettenip otyrmyz», - deıdi «QazMunaıGaz» Barlaý Óndirý» AQ-nyń bas dırektory Kenjebek Ibrashev.
