«QazMunaıGaz» Barlaý-Óndirý» AQ dırektorlar keńesi 2011 jyldyń bıýdjetin jáne 2010-2020 jyldarǵa arnalǵan Damý strategııasyn bekitti
ASTANA. 14 jeltoqsan. QazAqparat - Búgin «QazMunaıGaz» Barlaý- Óndirý» AQ dırektorlar keńesiniń kezekti otyrysy ótti, dep habarlady atalǵan kompanııanyń baspasóz qyzmetinen.
Dırektorlar keńesi QR Úkimeti men «QazMunaıGaz» UK» AQ-nyń resmı boljamdaryna sáıkes, Brent markaly munaı barreliniń baǵasyn 65 AQSh dollarymen esepteı otyryp, «QMG» BÓ»-niń 2011 jylǵa arnalǵan bıýdjetin bekitti. 2011 jyly kúrdeli salymdar 99,1 mlrd. teńge (661 mln. AQSh dollary) mólsherinde josparlanyp otyr, bul osy maqsattarǵa 2010 jyly josparlanǵan shyǵyndardan 15 paıyzǵa kóp. Kúrdeli salymdardyń artýyna qoldanystaǵy uńǵymalardy burǵylaý kóleminiń 213-ten 239-ǵa deıin kóbeıýi jáne «QMG» BÓ»-niń 2010 jyldaǵy bıýdjetimen salystyrǵanda geologııalyq barlaý jumystaryna kúrdeli shyǵystarynyń 4 mlrd. teńgeden (27 mln. AQSh dollarynan) 8 mlrd. teńgege (55 mln. AQSh dollary) deıin ósýi sebep boldy. Tuzasty uńǵymalaryn burǵylaý shyǵyndary qosymsha qaralatyn bolady.
«Bekitilgen bıýdjetke sáıkes, 2011 jyly tıimdilikke keri áser etýi múmkin faktorlardyń ishinde aǵymdaǵy jyldyń maýsym aıynda «QMG» BÓ»-niń óndiristik fılıaldarynda jalaqynyń artýy, aǵymdaǵy jyldyń tamyz aıynda eksporttyq kedendik baj salyǵynyń engizilýi jáne onyń mólsheriniń artý múmkindigi týraly aqparat ataldy», - delingen baspasóz habarlamasynda.
2011 jyly negizgi aktıvterde («Ózenmunaıgaz» ÓF jáne «Embimunaıgaz» ÓF) óndirý kólemin 2010 jyly josparlanǵan 8,781 tonnadan (táýligine 177 myń barrel) 9 100 myń tonnaǵa (táýligine 183 myń barrel) deıin arttyrý qarastyrylǵan. Bul kólemnen 1 900 myń tonna Atyraý MÓZ-de odan ári qaıta óńdeý úshin ishki naryqqa jetkiziledi.
Kompanııanyń atap ótýinshe, 2011 jyly artyqshylyqty aktsııalardy keri satyp alý baǵdarlamasy jalǵasady. 2010 jyldyń aqpanynda baǵdarlama bastalǵannan beri kompanııa 24 358 mln. teńge (165 mln. AQSh dollary) somasyna 1 346 213 artyqshylyqty aktsııa satyp aldy. Baǵdarlama 2011 jyldyń 31 jeltoqsanyna deıin aıaqtalady dep kútilýde. Qazirgi tańda aınalymdaǵy artyqshylyqty aktsııalar sany 2 789 894 quraıdy.
Dırektorlar keńesi sonymen qatar buǵan deıin jarııalanǵan «Mańǵystaýmunaıgaz», «Qazaqtúrikmunaı» jáne «Qazaqoıl-Aqtóbe» kompanııalaryndaǵy úlesterdi satyp alý jónindegi mámilelerdi bekitý barysy týraly aqparatty tyńdady. «QMG» BÓ»-niń bul mámilelerdi aıaqtaýǵa nıeti jáne kompanııa menedjmentiniń ony tezdetip aıaqtaý úshin tıisti sharalardy qolǵa alyp otyrǵany atalyp ótti. Sonymen qatar, qazirgi tańda atalǵan mámileler QR memlekettik organdarynyń qaraýynda jatyr.
