«QazMunaıGaz» Barlaý men óndirý» AQ sheteldik naryqtarǵa shyǵýǵa daıyn - bas dırektor A.Baljanov
ASTANA. 17 mamyr. QazAqparat /Arman Asqarov/ - Búgingi tańda biz shet elderdiń naryqtaryna shyǵýǵa ábden daıynbyz. Bizde oǵan qajetti qarajat bar.
Búgin Astanada ótken baspasóz máslıhatynda «QazMunaıGaz» Barlaý men óndirý» AQ-nyń bas dırektory Asqar Baljanov osylaı aıtty.
Onyń habarlaýynsha, kompanııa Reseı men Túrikmenstannyń munaı-gaz naryǵyn jan-jaqty zerttep, birqatar jobalarǵa qatysýǵa nıet bildirgen bolatyn. Biraq keıbir kommertsııalyq jáne uıymdastyrýshylyq máselelerge baılanysty ol jobalardan bas tartýǵa májbúr boldy. «Al «QazMunaıGaz» Barlaý men óndirý» kompanııasynyń Iraktaǵy Akkas ken ornyn ıgerýge qatyspaý sebebine keler bolsaq, ol eń birinshi, basqarý qyzmetine baılanysty. Biz ol jerdegi basqarý jumysyn óz qolymyzǵa alýdy josparlaǵan edik. Biraq Irak jaǵy oǵan kelispeıtindigin málimdedi. Odan keıin jergilikti bılik pen ol eldiń úkimeti arasyndaǵy keıbir kelispeýshilikterdi baıqaǵannan keıin, biz Akkas ken ornyn ıgerý jobasynan bas tartýdy uıǵardyq. Jalpy, bizdiń kompanııa shet elderdiń naryqtaryna shyǵýǵa ábden daıyn. Bizde oǵan qajetti qarajat bar», - dep atap kórsetti A.Baljanov.
