QazMunaıGaz Atyraý munaı óńdeý zaýytynyń úlesin jekeshelendirý máselesine qatysty túsinikteme berdi
ASTANA. KAZINFORM – «QazMunaıGaz» Atyraý munaı óńdeý zaýytynyń ıeleriniń biri retinde reseılik «Tatneft» kompanııasy qarastyrylýy múmkin degen aqparatqa túsinikteme berdi.
— Pavlodar jáne Atyraý munaı óńdeý zaýyttarynyń úlesin jekeshelendirý — Básekelestikti qorǵaý jáne damytý agenttiginiń usynysy. Bul usynys kvazımemlekettik sektordyń úlesin tómendetý esebinen munaı óńdeý salasynda jáne munaı ónimderi naryǵynda básekelestikti damytýǵa baǵyttalǵan. «QazMunaıGaz» UK AQ mundaı sheshimderdiń daıyndyq jumystary, atap aıtqanda korporatıvtik sheshim qabyldaý, tehnıkalyq jáne ekonomıkalyq aspektiler kóp ýaqytty qajet etetinin eskere otyryp, bul máseleni zerttep jatyr. Mundaı protsester ádette birneshe jylǵa sozylady, — delingen habarlamada.
QMG elimizde munaı-gaz hımııasy salasyn jan-jaqty damytyp, barlyq óndiris tizbegin birlesip qurý úshin seriktestermen yntymaqtastyq ornatýǵa ashyq kompanııa ekeni belgili. Osyǵan baılanysty alys jáne jaqyn shet elderdiń túrli kompanııalary, sonyń ishinde «Tatneft» JAQ qarastyrylyp otyr.
— «QazMunaıGaz» UK AQ jáne «Tatneft» JAQ kompanııalary ózara seriktestik qarym-qatynas aıasynda, sonyń ishinde jekelegen qondyrǵylar men tehnologııalar boıynsha, sondaı-aq «Atyraý munaı óńdeý zaýyty» JShS-niń munaı-hımııa shıkizaty bazasynda quny joǵary ónim shyǵarýdy uıymdastyrý baǵytynda únemi tájirıbe almasady, — delingen habarlamada.
Aıta ketsek, «Tatneft» JAQ tobyna kiretin kompanııalar óndiristiń operatsııalyq tıimdiligi men quny joǵary munaı hımııasy ónimderin shyǵarý salasynda joǵary nátıjelerge qol jetkizgen. Sonymen qatar «Tatneft» JAQ «Atyraý munaı óńdeý zaýyty» JShS-niń óndiristik qyzmetimen tikeleı baılanysty jańa munaı hımııasy jobalaryna, atap aıtqanda tereftal qyshqyly men polıetılentereftalat (TFK jáne PETF) óndirisine ınvestıtsııa quıýǵa qyzyǵýshylyq tanytty.
Úsh munaı óńdeý zaýytynyń óndiristik kórsetkishteri oń dınamıkany kórsetip otyr. Úsh munaı óńdeý zaýyty boıynsha jeńil munaı ónimderiniń ortasha ónimdiligi 2020 jylǵy 70%-dan 2024 jyly 74%-ǵa jáne 2025 jyldyń 1-toqsanynda fakt boıynsha 76%-ǵa deıin ósti. Óńdeý tereńdigi 2020 jylǵy 85%-dan 2024 jyly 87%-ǵa, al 2025 jyly 1-toqsanynda fakt boıynsha 88,6%-ǵa deıin ulǵaıdy.
Jalpy, Qazaqstannyń munaı óńdeý zaýyttarynda («CASPI BITUM» BK» JShS qosa alǵanda) byltyr 17,44 mıllıon tonna munaı óńdeldi. Іshki naryqty qamtamasyz etý úshin 2023 jylmen salystyrǵanda jeńil munaı ónimderin shyǵarý kólemin 370 myń tonnaǵa ulǵaıtý sharalary qabyldandy.
Aıta ketelik «QazMunaıGaz» 2024 jyly 8,3 trln teńge tabys kórgen.