«QazMunaıGaz» ataýyn jamylǵan pıramıda 15 kúnde 50% paıda ýáde etken

ASTANA. KAZINFORM — Qarjylyq monıtorıng agenttigi Shymkent qalasy boıynsha departamenti «QazMunaıGaz Invest» qarjy pıramıdasynyń zańsyz qyzmetin toqtatty.

Alaıaqtyq shema azamattardyń senimin teris paıdalaný arqyly qurylǵan. Uıymdastyrýshylar «QazMunaıGaz» Ulttyq kompanııasynyń aktsııalaryn satyp alý arqyly mol jáne jyldam tabys tabýǵa ýáde bergen. Kúdiktiler salymshylarǵa ár 15 kún saıyn 50% kiris túsetinin aıtyp, olardy aldaǵan. Alaıda is júzinde eshqandaı baǵaly qaǵazdar satyp alynbaǵan. Tólemder tek jańadan tartylǵan qatysýshylardyń qarajaty esebinen júzege asyrylǵan. Bastapqy salym somasy 500 myń teńgeden bastalǵan. Shamamen 200 azamat qarjy pıramıdasynyń qurbanyna aınalyp, jalpy somasy 1 mlrd teńgeden astam qarjysynan aıyrylǵan.

— Zańsyz jolmen alynǵan kiristerge kúdiktiler Túrkistan oblysynda jalpy quny 438 mln teńgeden asatyn múlik — eki qymbat kólik («Tank 500», «BMW X5»), turǵyn úı jáne kommertsııalyq nysan (meıramhana) satyp alǵan. Bul múlikter tárkileýden jasyrý maqsatynda týystarynyń atyna rásimdelgen. Sot sanktsııasymen atalǵan múlikke tyıym salyndy. Kúdiktiler qamaýǵa alyndy. Tergeý amaldary jalǵasady. QR Qylmystyq-protsestik kodeksiniń 201-babyna sáıkes ózge aqparat jarııa etilmeıdi, — dedi QMA resmı ókili Ernar Taıjan.

Budan buryn Almatyda «Matic Basket» qarjy pıramıdasy 2 myń adamnyń 80 mln teńgesin qoldy etkeni habarlandy.