Qazmunaıgaz suıytylǵan gaz tapshylyǵy týraly: Másele bizde emes, taratý tártibinde
ASTANA. KAZINFORM – «Qazmunaıgaz» kompanııasynyń basqarma tóraǵasy Ashat Hasenov Aqtaýdaǵy janarmaı stansalarynda suıytylǵan gazdyń tapshylyǵy týraly pikir bildirdi.
Buǵan deıin áleýmettik jelide Aqtaýdyń janarmaı stansalarynda suıytylǵan gazǵa kezek qalyptasqany týraly aqparat taraǵan bolatyn.
«Qazmunaıgaz» basshysy mundaı kezek janarmaı taratý tártibinen týyndaǵanyn aıtady.
«Energetıka mınıstrliginiń kestesinde kórsetilgen kólemniń bárin bólip otyrmyz. Tipti kesteden ozyp óndirip jatyrmyz. Óndirgen gazdyń bárin ishki naryqqa baǵyttap otyrmyz. Al qazirgi kezek máselesi kezeń saıyn bolyp turady. Másele taratý tártibinde. Óndirýshi retinde suıytylǵan gazdyń bárin ishki naryqqa jetkizip otyrmyz», - dedi Ashat Hasenov.
Osy aıdyń basynda Qazaqstan suıytylǵan gazdy syrtqa shyǵarýǵa 6 aılyq tyıym qoıǵan bolatyn.
