QazMunaıGaz Aqtaý qalasynda qaıyrymdylyq marafon ótkizdi
AQTAÝ. KAZINFORM – «Munaily Marathon» sharasyna elimizdiń toǵyz óńirinen 1000-nan astam qatysýshy jınaldy. Olardyń ishinde «Samuryq-Qazyna», QazMunaıGaz jáne onyń enshiles kompanııalarynyń qyzmetkerleri, kásibı sportshylar men Mańǵystaý óńiriniń turǵyndary bar.
Qatysýshylar 5 jáne 10 km qashyqtyqty eńserdi. Qaıyrymdylyq marafony elimizdiń tarıhyndaǵy mańyzdy meje — Qazaqstan munaıynyń 125 jyldyǵyna arnalǵan.
Barlyq jınalǵan qarajat Túpqaraǵan jáne Qaraqııa aýdandary men Jańaózen qalasyndaǵy úsh tirek mekteptiń sport zaldaryn qosymsha jaraqtandyrýǵa jumsalady. Bul balalardyń fızıkalyq damýyna jaǵdaı jasaýǵa jáne jas urpaqty salaýatty ómir saltyna tárbıeleýge múmkindik beredi.
QMG basshysy Ashat Hasenov qaıyrymdylyq marafonnyń qatysýshylaryna alǵysyn bildirip, «Munaily Marathon» sportty nasıhattaýmen birge, qaıyrymdylyq jáne qoǵamdyq jobalardy qoldaý arqyly ıgi iske árbir adamnyń óz úlesin qosýyna múmkindik beretinin atap ótti.
QazMunaıGaz buqaralyq sportty qoldap, qaıyrymdylyq bastamalarǵa únemi qatysyp keledi.
Sonymen qatar Ulttyq kompanııa óz kásiporyndary ornalasqan óńirlerde áleýmettik jobalardy belsendi túrde iske asyryp jatyr.
