QazMunaıGaz 80 tehnologııalyq jobany júzege asyryp jatyr
ASTANA. KAZINFORM – «QazMunaıGaz» UK» AQ jalpy qarjylandyrý kólemi 17,3 mlrd teńge ǵylymı-zertteý jobalary keshenin júzege asyryp jatyr. Bul týraly Úkimet otyrysynda kompanııa basqarma tóraǵasy Ashat Hasenov málim etti.
Onyń aıtýynsha, atalǵan keshen 80 tehnologııalyq mindetti qamtıdy jáne tek kompanııanyń emes, tutastaı salanyń negizgi ári júıeli syn-qaterlerin sheshýge baǵyttalǵan.
– Qorlardy ulǵaıtý, munaı óndirý tıimdiligin arttyrý, sondaı-aq kómirsýtekterdi tereń óńdeý maqsatynda óndiristik tizbektiń barlyq kezeńinde jańa tehnologııalar turaqty túrde izdestirilip, engizilip jatyr, – dedi ol.
Sonymen qatar Ashat Hasenov jobalardy iske asyrýǵa elimizdiń jetekshi joǵary oqý oryndary tartylǵanyn atap ótti. Bul, onyń sózinshe, munaı-gaz salasyndaǵy ǵylymı áleýet pen óndiristik qajettilikterdi tıimdi ushtastyrýǵa múmkindik beredi.
Aıta keteıik, Úkimet basshysy Oljas Bektenov «QazMunaıGaz» basshysyna otandyq tehnologııaǵa kóbirek qarjy jumsaýdy tapsyrǵan edi.
