«QazMunaıGaz» «5/50» boıynsha ketken burynǵy jumyskerlerdiń úndeýine túsinikteme berdi
2017 jyldyń sáýir aıynda «QazMunaıGaz» UK AQ Basqarmasy «Oil Services Company» JShS, «Oil Construction Company» JShS, «Oıl Transport Korporeıshen» JShS, «Munaıtelekom» JShS jáne «Mańǵystaýenergomunaı» JShS munaı-servıstik kásiporyndarynda «Taraptardyń kelisimi boıynsha qyzmetkerlermen eńbek shartyn merziminen buzý týraly erejeni» («5/50» baǵdarlamasy) bekitti.
Bul baǵdarlama aıasynda munaı-servıstik mekemelerdiń jumyskerlerine 5 jyldaǵy laýazymdyq eńbekaqysynyń 50% mólsherinde qomaqty ótemaqy tóleı otyryp, taraptardyń kelisimi boıynsha eńbek shartyn buzý qarastyryldy.
Ereje talaptaryn túsindirý maqsatynda jumys toptary qurylyp, eńbek ujymdarymen únemi kóshpeli kezdesýler ótkizilip turdy.
Jumyskerler «5/50» baǵdarlamasyna erikti túrde qatysqanyn atap ótken jón. Mysaly, Eńbek shartyn buzý týraly kelisimniń 1-tarmaǵynda «taraptar taraptardyń kelisimi boıynsha eńbek shartyn buzý týraly ekijaqty erikti kelisimge keldi» delingen. Sonymen qatar, usynystan bas tartqan jumyskerler osy ýaqytqa deıin QMG-nyń munaı-servıstik mekemelerinde jumysyn jalǵastyryp jatqandyǵy bunyń taǵy bir dáleli bolyp tabylady.
Kelisim talaptaryna sáıkes jumyskerlerdi QMG-nyń munaı-servıstik kompanııalarynyń shtatyna qaıta qabyldaý qarastyrylmady. Osylaısha, kompanııa 5 jyl ótkennen keıin jumystan shyqqan jumyskerlerdi qaıta jumysqa qabyldaý týraly eshqandaı mindetteme alǵan joq.
Buǵan qaramastan, osy jyldyń naýryz aıynyń 9-y kúni burynǵy jumyskerlerdiń bir toby olarǵa 5 jylǵa tólengen aqsha qarajaty taýsyldy degendi alǵa tartyp, Mańǵystaý oblysynyń ákimdigine olardy QMG-nyń munaı servıstik mekemelerine qaıta jumysqa alýdy talap etip keldi.
Jınalǵandarmen Mańǵystaý oblysynyń ákimi Nurlan Noǵaev jáne «QazMunaıGaz» UK AQ Basqarma tóraǵasynyń orynbasary Qurmanǵazy Esqazıev kezdesti. Olar kezdesýdiń qatysýshylaryna talaptarynyń zańsyz ekendigin túsindirip, máseleni sotqa júginý arqyly zań aıasynda sheshýge usynys berdi.
«5/50» baǵdarlamasyna «Mańǵystaýmunaıgaz» AQ munaı-servıstik mekemelerinen barlyǵy 3968 adam qatysty, olarǵa 43 mlrd 881 mln teńge jalpy somaǵa ótemaqy tólendi.
