«QazMunaıGaz» 2020 jylǵy qarjylyq kórsetkishterin jarııa etti
NUR-SULTAN. QazAqparat – «QazMunaıGaz» UK» AQ 2020 jylǵy negizgi qarjylyq kórsetkishterin jarııa etti, dep habarlaıdy QazAqparat tilshisi.
«QMG úshin 2020 jyl kúrdeli kezeńge aınaldy. Degenmen, kompanııamyz barlyq qıyndyqty eńsere bildi. 2020 jyly QMG qarjylyq nátıjelerine munaı baǵasynyń quldyraýy, OPEK+ kelisimi aıasynda munaı óndirýdi shekteý jáne koronavırýs indeti sııaqty faktorlar edáýir yqpal etti. Biraq syrtqy syn-tegeýringe qarsy turý úshin der kezinde qolǵa alynǵan is-sharalar biz boljaǵannan da jaqsy kórsetkishterge jetýge múmkindik berdi. QMG bul joly munaı baǵasynyń tómendeýine barynsha daıyn bolyp shyqty. 2020 jyldyń qorytyndysy boıynsha kompanııa oń bos aqsha aǵynyn qamtamasyz etip, kredıttik reıtıngterdi saqtaı aldy. Qarjylyq kovenanttardyń buzylýyna jáne qaryzdyń ósýine jol berilmedi», - dedi QMG Basqarma tóraǵasynyń orynbasary Dáýren Qarabaev.
Onyń dereginshe, Túsim 2019 jylǵy 6 859 mlrd teńgemen salystyrǵanda, 2020 jyly 4 556 mlrd teńgeni qurady. EBITDA kórsetkishi 1 151 mlrd teńge boldy. Kompanııanyń taza paıdasy 172 mlrd teńgege jetti. Bos aqsha aǵyny 88 mlrd teńgeni qurady. 2020 jylǵy 31 jeltoqsanda kompanııanyń taza qaryzy 6 162 mln AQSh dollarǵa jetip, 2019 jyldyń sońyndaǵy kórsetkishpen salystyrǵanda 0,2 paıyzǵa tómendedi. Taza qaryz 2019 jylǵy 31 jeltoqsandaǵy kórsetkishpen salystyrǵanda 2020 jylǵy 31 jeltoqsanda 3,4 paıyzǵa tómendep, 9 690 mln AQSh dollaryn qurady.
