«QazMunaıGaz» 2011 jyldyń 1-shi jartysynda 10,67 mıllıon tonna munaı jáne gaz kondensatyn óndirdi
ASTANA. 22 tamyz. QazAqparat /Aıdar Ospanalıev/ - «QazMunaıGaz» kompanııalary toby 2011 jyldyń 1-shi jartysynda 10,67 mıllıon tonna munaı jáne gaz kondensatyn óndirdi. Bul 2010 jyldyń osy merzimimen salystyrǵanda 0,5% kem. Al tabıǵı gaz óndirý 1,4 mln. tonnany qurady, bul ótken jyldyń kórsetkishimen salystyrǵanda 2% artyq bolyp otyr. Bul týraly «QazMunaıGaz» ulttyq kompanııanyń baspasóz qyzmeti habarlady.
Baspasóz málimetterine qaraǵanda, bıylǵy jartyjyldyqta magıstraldy munaı qubyrlary arqyly munaı tasymaldaý kólemi 33,7 mıllıon tonnany quraǵan. Bul ótken jyldyń osy merzimindegi kórsetkishten 3 paıyzǵa kóp. 2011 jyldyń birinshi jartysynda teńiz arqyly munaı tasymaldaý kólemi 24% artyp, 4,2 mıllıon tonnany quraǵan. Sondaı-aq gaz tasymaldaý kólemi 54,3 mıllıard tekshe metrdi qurap, ótken jyldyń osy merzimindegi kórsetkishten 3% asyp túsken.
Buǵan qosa 2011 jyldyń 1-shi shildesindegi jaǵdaı boıynsha, shoǵyrlandyrylǵan munaı óńdeý kólemi (The Rompetrol Group-ty qosa eseptegende) 7,4 mln. tonnany qurap, bul kórsetkish ótken jyldyń osy merzimimen salystyrǵanda 5 paıyzǵa kem bolyp otyr. Bıylǵy jyldyń birinshi jartysynda elimizdiń úsh munaı óńdeý zavodynda shoǵyrlandyrylǵan munaı óńdeý kólemi 5,3 mıllıon tonna shamasynda boldy.
