QazMemQyzPÝ jastary jemqorlyqsyz qoǵamdy qoldaıdy (FOTO)
ASTANA. QazAqparat - 9 jeltoqsan - Halyqaralyq sybaılas jemqorlyqpen kúres kúnine oraı Qazaq memlekettik qyzdar pedagogıkalyq ýnıversıtetiniń stýdentteri «Biz jemqorlyqsyz qoǵamdy qoldaımyz!» atty aktsııa ótkizdi.
Bul týraly atalǵan oqý ornynyń baspasóz qyzmetinen habarlady.
QazMemQyzPÝ rektor apparatynyń qoldaýymen jáne Stýdenttik ombýdsmenniń uıymdastyrýymen ótkizilgen aktsııaǵa ózin-ózi basqarý uıymdarynyń belsendi stýdentteri qatysty.
«Biz bul aktsııany uıymdastyra otyryp, jastardy jemqorlyqsyz qoǵam qalyptastyrýǵa úıretýdi, para berý jáne alý sharalarynyń úlken zań buzýshylyq ári qylmystyq is ekendigin túsindirýdi, osy arqyly bolashaqta óz quqyqtaryn qorǵaýdy, zań aıasynda jumys isteýge baýlýdy maqsat ettik», - deıdi Stýdenttik ombýdsmen tóraıymy Saltanat Ábdijapprova.
Aktsııa barysynda stýdenttik ózin-ózi basqarý uıymdarynyń belsendi stýdentteri plakattarǵa jemqorlyqty boldyrmaýǵa baılanysty ıdeıalaryn beınelep, beınelegen sýretterdi túsindirip berdi.
Jastar isi jónindegi komıtettiń múshesi Jaqsygúl Bekaıdar: «Jemqorlyq bul tek bizdiń elimizde ǵana emes, búkil álemniń derti bolyp otyr. Árıne, sybaılas jemqorlyqty joıýǵa árbir adam atsalysýy kerek. Osy dertpen kúreste jastar bilimdi, qabiletti, saýatty bolǵanda ǵana úles qosa alady. Kez kelgen jerde óz quqyǵyńdy qorǵap, qabiletińdi kórsetip, adal jumys isteı bilgende ǵana, ashyq básekelestik oryn alǵanda ǵana bul joıylady dep oılaımyn», - deıdi.
Aktsııaǵa belsendi qatysqan barlyq jastarǵa alǵys hattar tabys etilip, árqaısysy óz ortalarynda sybaılas jemqorlyqpen kúresý kerektigi týraly aıtady degen senim artyldy.
