Qazmedıa ortalyǵy burynǵy qyzmetkerden 10 mln teńge óndirip aldy
ASTANA. QazAqparat - Burynǵy qyzmetker jumystan bosatylǵannan keıin aqsha jetispeýshilik oryn alǵan, dep habarlady Astana sotynyń baspasóz qyzmetinde.
«2012 jyly jaýapker stýdııadan tys quraldar bóliminiń televızııalyq-jýrnalıstik kesheniniń ınjeneri laýazymyna qabyldandy. «Qazmedıa ortalyǵynda» jumys istegen kezeńde ol materıaldyq-jaýapty tulǵa boldy. 2015 jyly qyzmetkerdiń ótinishimen ınjenermen eńbek sharty buzylady. Alaıda qabyldaý-tapsyrý aktisi boıynsha materıaldyq qundylyq tapsyrylmaǵan.
Qordaǵy quraldardy, negizgi quraldardy, materıaldyq emes aktıvterdi túgendeý qorytyndysy boıynsha somasy 10 mıllıon teńgeden astam taýar-materıaldyq qundylyqtyń jetispeıtini anyqtaldy», - dep habarlady sottyń baspasóz qyzmetinen. Astana qalasy Saryarqa aýdandyq soty talaparyzdy qanaǵattandyrdy, burynǵy qyzmetkerden 10 383 299 teńge kóleminde materıaldyq shyǵyndy óndirip berdi. Sot sheshimi zańdy kúshine endi.
