QazKSR eńbek sińirgen óner qaıratkeri, aktrısa Gúlfaırýz Ysmaıylova 84 jasqa qaraǵan shaǵynda dúnıeden ótti
ASTANA. 13 mamyr. QazAqparat - Almatyda 12 mamyr kúni 84 jasqa qaraǵan shaǵynda Qazaq KSR halyq sýretshisi, QazKSR eńbek sińirgen óner qaıratkeri, aktrısa Gúlfaırýz Ysmaılova ómirden ozdy.
Gúlfaırýz Mansurqyzy Ysmaılova 1929 jyldyń 15 jeltoqsanynda Almaty qalasynda dúnıege kelgen. Onyń shyn esimi Qonarbaeva Kúlpash Tańsyqbaıqyzy. Baldáýren shaǵynda ony Mansur Ysmaıylov asyrap alǵan. Onyń bes perzentiniń ishinde Gúlfaırýz úlken qyzy edi.
G. Ysmaılova 1949 jyly Almaty beıneleý óneri ýchılışesin támamdady, ol Qazaq KSR halyq sýretshisi A.M. Cherkasskıı sheberhanasynda tálim aldy. Sonymen birge 1956 jyly Repın atyndaǵy Lenıngrad kórkem sýret, músin jáne sáýlet ınstıtýtynyń dıplomyn ıelengen.
1957 jyldan Qazaqstannyń sýretshiler odaǵyna múshe. 1970 jyldardyń basynda Gúlfaırýzǵa Abaı atyndaǵy Qazaq memlekettik opera jáne balet teatrynyń bas sýretshisi mindeti júkteldi.
Ol «Er Tarǵyn», «Chıo-Chıo-San», «Aıda» ispetti operalardyń, «Qyz Jibek» jáne t.b. kınotýyndylardyń dekoratsııasy men kostıýmdaryna eskızder ázirlegen. G. Ysmaıylovanyń portrettik jáne kórkem sýret týyndylarynyń sany 100-den asyp jyǵylady.
Ol «Alıtet ýhodıt v gory» týyndysynda Tygrenanyń, «Botagóz» fılmindegi bas keıipkerdiń, «Qyz Jibektegi» Tananyń beınesin somdaýǵa at salysty.
Óz isiniń maıtalmany «Qurmet belgisi»; Halyqtar dostyǵy; «Parasat» ordenderimen, ónerge qosqan súbeli úlesi úshin «Tarlan» syılyǵymen marapattaldy.
