«Qazkomnyń» ıpotekalyq qaryzdaryn «Halyq banki» qaıta qarjylandyrady

ASTANA. QazAqparat - QR Ulttyq banki ıpotekalyq qaryzdardy qaıta qarjylandyrý mindetiniń bir bankten ekinshi bankke aýysatynyn málimdedi, dep habarlaıdy QazAqparat tilshisi.

«Kazkommertsbank» AQ-ny «Qazaqstan Halyq Banki» AQ-yna qosý arqyly  eki bankti erikti túrde qaıta uıymdastyryp, aqparattyq júıelerin ózara yqpaldastyrýǵa baılanysty «Qazkommertsbank» AQ-nyń barlyq quqyqtary men mindetteri «Qazaqstan Halyq Banki» AQ-syna tapsyrylady. Ulttyq bank óz kelisimin berdi. Oǵan sáıkes, 2018 jylǵy 1 tamyzdan bastap «Kazkommertsbank» AQ qaryz alýshylarynyń ıpotekalyq zaemdaryn qaıta qarjylandyrýǵa qatysty ótinishterin «Qazaqstan Halyq Banki» AQ qabyldaıdy», - delingen Ulttyq banktiń resmı saıtynda. 

Baǵdarlamanyń talaptarymen «Qarjylyq qyzmetterdi tutynýshylardyń quqyqtaryn qorǵaý» bóliminde myna silteme - https://www.nationalbank.kz/?docid=1552&switch=russian boıynsha tanysýǵa bolady.

Aıta keteıik, ıpotekalyq qaryzdardy qaıta qarjylandyrý baǵdarlamasy eki baǵyttan turady. Birinshi baǵyt boıynsha teńgemen berilgen ıpotekalyq qaryzdar qaıta qarjylandyrylsa,  ekinshi baǵyt aıasynda valıýtalyq qaryzdardy teńgege aýystyrý kózdelgen.